Սյունիքի մարզի 2 000 հա վարելահող դիտարկման տակ է՝ չի մշակվում
Սյունիքի մարզը հայտնի է իր ռելիեֆի կտրտվածությամբ, բարձրադիր ու ցածրադիր տարածքների մեծ տարբերությամբ: Սյունիքում հանդիպում են չոր մերձարևադարձային, չափավոր տաք, բարեխառն, ցուրտ լեռնային և ձյունամերձ կլիմայական գոտիներ: Տարբեր պատճառներով, մարզի 43.9 հազ. հա վարելահողերից վերջին տարիներին զգալի հատվածը չի մշակվում:
Ըստ պաշտոնական աղբյուրների, չօգտագործվող վարելահողերը հիմնականում գտնվում են բարձրադիր գոտում և ունեն մեծ թեքություններ, համայնքներն ունեն ոռոգման խնդիր, հաճախ է գարնանային ցրտահարություն գրանցվում: Բացի այդ, արդեն երկու տարի է մարզի խնդիրներին գումարվել է նաև սահմանամերձությունը:
Որոշ համայնքների հողատարածքներ հայտնվել են դիտարկման տակ և խնդիր է դրանք օգտագործելը: Նկատի ունենալով մարզի ուղղաձիգ ռելիեֆը՝ վարելահողեր չմշակելը լուրջ խնդիր է համայնքի, մեծ հաշվով հանրապետության համար:
Սյունիքի մարզպետարանի գյուղատնտեսության բաժնի պետ Էդիկ Բունիաթյանը նշում է, որ այն համայնքներում, որտեղ ոռոգման ջրի խնդիր կար, ՄԱԿ-ի ՊԳԿ-ի միջոցներով լուծվում է, խողովակաշար է անցկացվում 7 գյուղում. Սրաշեն, Վերիշեն, Ծղուկ և այլն. Կունենան ոռոգման արդիական համակարգ:
Հարցին թե արդյոք սահմանամերձությու՞նն է այդ գյուղերի ոռոգման խնդիրը, նա պատասխանեց, որ նախկին ոռոգման համակարգը քայքայված վիճակում էր և նորն ունենալու անհրաժեշտություն կար:
Ըստ նրա՝ մարզն ընդհանուր առմամբ ունի 306.3 հազ հա գյուղնշանակության հող, որից՝ 43.9 հազ հա վարելահող։ Այս տարի կատարվել է 12 հազար հա աշնանացան և 4000 հա գարնանացան:
Է. Բունիաթյանը նշեց, որ նախորդ տարի 6000 հա էր գարնանացան կատարվել, նախկինում սերմացուն, դիզվառելիքը սուբսիդավորվում էր, իսկ այժմ սերմացուն չի սուբսիդավորվում, իսկ դիզվառելքի գինը գյուղաբնակի համար շատ բարձր է:
Էդիկ Բունիաթյանը ներկայացրեց նաև, որ մարզի 2000 հա վարելահողերը դիտարկման տակ են ու չեն մշակվում. Արավուս, Խնածախ, Տեղ,Կոռնիձոր, Վաղատուր, Խնձորեսկ և այլ համայնքներում:
Ինչ վերաբերում է անասնապահությանն, ապա այս տարի թե ՛ խոշոր, թե ՛ մանր եղջերավորների գլխաքանակը 7-8 հազարականով նվազել է. կերի, արոտի խնդիրներ կան մարզում:
Ինչպես վարելահողերի, այնպես էլ արոտավայրերի մի մասը դիտարկման տակ է, և սահմանին մոտ լինելը դժվարացնում է անասնապահի աշխատանքը:
«Մեկ ամիս առաջ թշնամին իջավ, Տեղ գյուղից 2 կով տարավ, անցած տարի 350 մանր եղջերավոր տարան՝ չտվեցին: Կենդանիները մոտենում են սահմանին՝ նրանք էլ իջնում տանում են՝ գողանում են»,-ասաց նա:
Է. Բունիաթյանը հավելեց նաև, որ չնայած խնդիրներին՝ մարզում գյուղատնտեսական կյանքը տարեց տարի աշխուժանում է՝ խելացի անասնագոմեր, ջերմոցներ, պտղատու ինտենսիվ այգիներ են հիմնվում:
Ընդգծենք, որ, եթե այս տարի մարզում ցանվել է 12 հազար հա աշնանացան և 4 հազար գարնանացան, ապա 28 հազար հա վարելահող պարզապես չի մշակվում, եթե այս թվից էլ հանենք 2 հազար հա-ը որպես դիտարկման տակ գտնվող, ապա Սյունիքի մարզում տարբեր պատճառներով 26 հա վարելահող ուղղակի չի ցանվում: Իսկ այս տարի պարարտանյութի խնդիրն ակնհայտ է, որ չի նպաստել ցորենի և գարու ցանքատարածությունների ավելացմանը: Այս առումով, պետությունը պետք է հստակ քայլերի գնա․ ինչպես ասում են՝ դեմքով շրջվի դեպի գյուղատնտեսությունը:
Ի դեպ, Սյունիքի մարզի գյուղատնտեսական հողատեսքերն ընդգրկում են մարզի ընդհանուր տարածքի 74.1%-ը կամ 334019 հա:
Մարզի գյուղատնտեսական հողատեսքերի մեջ մեծ կշիռ ունեն արոտավայրերը (52.4%) և վարելահողերը (13.1%):