«Տնտեսական լրագրողների ակումբ» հասարակական կազմակերպությունը ստեղծվել է 2003թ.-ին տնտեսական թեմաներով գրող մի խումբ լրագրողների նախաձեռնությամբ: Այն միավորում է հանրապետության տպագիր, էլեկտրոնային մամուլի եւ հեռուստատեսության տնտեսական թեմաներով գրող երկու տասնյակից ավել լրագրողների: 2004թ.-ից առ այսօր կազմակերպությունն ակտիվ գործունեություն է ծավալում երկրի տնտեսական հիմնախնդիրների համակողմանի լուսաբանման ուղղությամբ` կազմակերպելով.

  • Կլոր սեղաններ և մամուլի ասուլիսներ
  • Սեմինար-քննարկումներ
  • Մեդիա-տուրեր
  • «Առանց փողկապի» հանդիպումներ
  • Առկա և հեռավար կոնֆերանսներ

Ակումբի առանցքային նպատակներից է ֆինանսական գրագիտության մակարդակի բարձրացումը, տնտեսական թեմաներով գրող լրագրողների մասնագիտական, վերլուծական և հետաքննական կարողությունների զարգացումը։ Այս նպատակով իրականացվել են տնտեսական թեմաներով գրող լրագրողների վերապատրաստման ծրագրեր ՄԱԿ-ի Զարգացման ծրագրի հայաստանյան գրասենյակի, Կոնրադ Ադենաուեր հիմնադրամի, Հայաստանի բանկերի միության, պետական և մասնավոր կառույցների աջակցությամբ։ Հայաստանում ԱՄՆ դեսպանատունը երեք տարի անընդմեջ իրականացրել է բիզնես անգլերենի ուսուցման վեցամսյա դասընթացներ Ակումբի լրագրողների համար:

Համագործակցության շրջանակներում Ակումբի մի խումբ անդամներ ԱՄՆ կառավարության հրավերով այցելել են Միացյալ Նահանգներ՝ ծանոթացելու այդ երկրի իրենց գործընկերների աշխատանքին, պետական, մասնավոր, ֆինանսական հատվածներում իրականացվող սոցիալ-տնտեսական քաղաքականությանը:

Հանդիպումներ, փորձի փոխանակման ծրագեր են իրականացվել տարբեր երկրների (մասնավորապես Արևելյան Եվրոպայի) լրագրողների հետ:

Ակումբը գործընկերների, հովանավորների աջակցությամբ նախաձեռնել և իրականացրել է տնտեսական, տնտեսագիտական գիտելիքները և լրագրողական հմտությունները զարգացնող ուսումնասիրոթյուններ, գրքերի տպագրություն: Լրագրողների համար տպագրվել են «Ամենագործածական տնտեսագիտական տերմինների բացատրական բառարան»(Հայէկոնոմբանկի աջակցությամբ 2008թ.), և «Համաշխարհային ճգնաժամը և տնտեսական լրատվությունը» (ՄԱԿ-ի զարգացման ծրագրի Հայաստանյան գրասենյակի աջակցությամբ 2009թ.), «Հայաստանի ներդրումային միջավայրը, իրավական դաշտը եւ առկա հիմնախնդիրները» (Կոնրադ Ադենաուեր հիմնադրամի աջակցությամբ 2019թ.), «Դուալ կրթության խնդիրներն ու հնարավորությունները Հայաստանում» (Կոնրադ Ադենաուեր հիմնադրամի աջակցությամբ 2019թ.) ժողովածուները:
Կոնրադ Ադենաուեր հիմնադրամը 2009թ.-ից Ակումբի գործընկերն է, որի աջակցությամբ ավելի քան մեկ տասնամյակ  իրականացվում  են մարզային լրագրողների ցանցի ուժեղացման, մարզային  տնտեսական լրագրության զարգացման, երկրի տնտեսական օրակարգային խնդիրների հանրային քննարկումների ծրագրեր։

Վերջին տարիներին Ակումբը զուգահեռաբար զբաղվում է նաև PR արշավների կազմակերպմամբ։