Օրենսդրական նախաձեռնություն սննդամթերքի անվտանգության պետական վերահսկողության եւ բուսասանիտարիայի ոլորտներում
Նախաձեռնության նպատակը սննդամթերքի անվտանգության պետական վերահսկողության եւ բուսասանիտարիայի ոլորտներում հրատապ լուծում պահանջող խնդիրներին հնարավորինս արագ հանգուցալուծում տալու անհրաժեշտությունն է: ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովը հունիսի 7-ին գումարված նիստում առաջին ընթերցմամբ քննարկել է ««Սննդամթերքի անվտանգության պետական վերահսկողության մասին» օրենքում լրացումներ կատարելու մասին» եւ ««Բուսասանիտարիայի մասին» օրենքում լրացումներ կատարելու մասին» օրենսդրական փաթեթը:
Ըստ ԱԺ պաշտոնական տեղեկատվության՝ ՀՀ էկոնոմիկայի նախարարի տեղակալ Աշխեն Շիրվանյանը պարզաբանել է, որ խնդիրը վերաբերում է պեստիցիդների եւ ագրոքիմիկատների ներմուծմանը: Հարցն այն է, որ ՍԱՏՄ պետի հրամանով հանրապետությունում գրանցված պեստիցիդների անվանացանկում փոփոխություն է կատարվել, որով ավելացվել է երկու պահանջ` արտադրող երկրի եւ ֆիրմայի վերաբերյալ, ինչի հետեւանքով պեստիցիդներ եւ ագրոքիմիկատներ ներմուծելու հարցում խնդիրներ են առաջացել: Առաջարկվող փոփոխություններով նախատեսվում է կարգավորել այդ նյութերը ներմուծելու հարցը:
Օրենսդրական նախաձեռնությանը հանձնաժողովը դրական եզրակացություն է տվել: