Կայացել է ԱԺ Աշխատանքի և սոցիալական հարցերի մշտական հանձնաժողովի նիստը
Հունիսի 9-ին կայացել է ԱԺ Աշխատանքի եւ սոցիալական հարցերի մշտական հանձնաժողովի նիստը։
Ըստ ԱԺ պաշտոնական հաղորդագրության՝ Հանձնաժողովը դրական եզրակացություն է տվել քննարկված նախագծերին։
- Նախագծով առաջարկվում է «Զբաղվածության մասին» օրենքից հանել զբաղվածության կարգավորման ամենամյա պետական ծրագրի մշակման համար հիմք հանդիսացող լիազորող նորմը` ելնելով դրա անարդյունավետությունից, -այս մասին ասել է ՀՀ աշխատանքի եւ սոցիալական հարցերի նախարարի տեղակալ Ռուբեն Սարգսյանը` ԱԺ աշխատանքի եւ սոցիալական հարցերի մշտական հանձնաժողովի` հունիսի 9-ի արտահերթ նիստում առաջին ընթերցմամբ քննարկման ներկայացնելով ««Զբաղվածության մասին» օրենքում փոփոխություններ կատարելու մասին» օրենքի նախագիծը:
«Որպեսզի ամեն տարի մենք 7 կամ 8 ծրագիր չհաստատենք, այդ 7-8 ծրագրերը որոշակի փոփոխություններով միշտ կլինեն Միասնական սոցիալական ծառայությունում: Շահառուները կամ որեւէ ծրագրի մասնակից դառնալ ցանկացող քաղաքացիները կարող են գնալ եւ մասնակցել այդ ծրագրերին: Այստեղ համակարգեր քանդելու կամ նոր համակարգեր ստեղծելու խնդիր ընդհանրապես չկա: Ճիշտ հակառակը` քարացած համակարգը կամ չաշխատող ծրագրերն ավելի արդյունավետ եւ դինամիկ դարձնելու համար գնում ենք այս ուղղությամբ»,- ասել է նիստը վարող Լիլիթ Ստեփանյանը` արձագանքելով հանձնաժողովի անդամ Աղվան Վարդանյանին, որը պնդում էր, թե այս առաջարկով համակարգ է քանդվում:
Նախագծին հանձնաժողովը դրական եզրակացություն է տվել:
Հանձնաժողովը երկրորդ ընթերցմամբ քննարկել է «Կամավոր աշխատանքի մասին» եւ հարակից օրինագծերի փաթեթը: ՀՀ աշխատանքի եւ սոցիալական հարցերի նախարարի տեղակալ Ռուբեն Սարգսյանը հայտնել է, որ ընդունվել են պատգամավորների բոլոր առաջարկները, ինչի արդյունքում փաթեթը լրամշակվել է:
Այս նախագծի վերաբերյալ եւս հանձնաժողովի եզրակացությունը դրական էր:
Նախագծերը կընդգրկվեն ԱԺ առաջիկա հերթական նիստերի օրակարգերի նախագծերում: