Մեծ Բրիտանիայում պետական պարտքի չափը 1961 թվականից ի վեր առաջին անգամ գերազանցել է ՀՆԱ-ն
62 տարվա ընթացքում առաջին անգամ Մեծ Բրիտանիայի պետական պարտքի չափը գերազանցել է ՀՆԱ-ի չափը՝ մայիսին կազմելով դրա 100,1%-ը կամ 2,267 տրիլիոն ֆունտ ստեռլինգ: Այդ մասին հաղորդում է ТАСС-ը՝ վկայակոչելով Միացյալ Թագավորության Ազգային վիճակագրական ծառայության (Office for National Statistics, ONS) տարածած տվյալները։
«Վերջին անգամ ՀՆԱ-ի նկատմամբ պարտքի չափը գերազանցել է 100%-ը 1961 թվականի մարտին», - նշված է փաստաթղթում։
ONS-ի տվյալներով՝ դա տեղի է ունեցել 2023 թվականի մայիսին պետական հատվածի փոխառությունների աճի պատճառով։ Դրանք կազմել են 20 միլիարդ ֆունտ: Փոխառությունների աճը պայմանավորված է եղել բնակչության էլեկտրաէներգիայի ծախսերի փոխհատուցման` կառավարության լայնածավալ ծրագրով, ինչպես նաև աշխատավարձերի բարձրացմամբ: Դա հանգեցրել է պետական հատվածի ծախսերի ավելացման:
Sky News հեռուստաալիքն այս առնչությամբ նշում է, որ հրապարակված վիճակագրությունը վկայում է, որ վարչապետ Ռիշի Սունակը չի կարողանում իրականացնել կառավարության առջև դրված հինգ նպատակներից մեկը՝ կրճատել պետական պարտքի չափը։ Նրան չի հաջողվում նաև կիսով չափ կրճատել գնաճը. սա կառավարության հայտարարված առաջնահերթություններից երկրորդն է։
Աղբյուրը՝ armenpress.am