Չինաստանի «Մեկ գոտի՝ մեկ ճանապարհ» նախաձեռնությանն աջակցել են ՇՀԿ բոլոր երկրները, բացի Հնդկաստանից
Ղազախստանը, Ղրղըզստանը, Պակիստանը, Ռուսաստանը, Տաջիկստանը եւ Ուզբեկստանն աջակցում են Չինաստանի «Մեկ գոտի՝ մեկ ճանապարհ» ներդրումային եւ առեւտրային նախաձեռնությանը: Այս մասին ասվում է համատեղ հռչակագրում, որը Նյու Դելիում ստորագրել են ՇՀԿ պետությունների ղեկավարները, գրում է ՏԱՍՍ-ը։
«Մեկ գոտի՝ մեկ ճանապարհ» նախաձեռնությունը 2013 թվականին առաջ է քաշել ՉԺՀ նախագահ Սի Ծինփինը։ Այն խորհրդանշականորեն վերստեղծում է հին Մետաքսի ճանապարհը: Դրա նպատակն է Չինաստանի մուտքը Կենտրոնական Ասիայի, Մերձավոր Արեւելքի, Եվրոպայի, Աֆրիկայի եւ այլ տարածաշրջանների շուկաներ, ինչպես նաեւ ավելի մեծ թվով երկրների մասնակցությամբ Միջազգային առեւտրային եւ ներդրումային նախագծերի ակտիվացում եւ շահագրգիռ պետությունների կապիտալի օգտագործում: Նախաձեռնությանն արդեն միացել են ավելի քան 150 երկրներ եւ միջազգային կազմակերպություններ։