ԱՆԻՖ-ը հիմնադրման պահից մոտ 3,5 տարի անց գրանցել է զուտ ֆինանսական շահույթ

Ընթացիկ տարվա հուլիսին ամփոփվել են Հայաստանի պետական հետաքրքրությունների ֆոնդի՝ ԱՆԻՖ-ընկերությունների խմբի 2022 թվականի ֆինանսական արդյունքները։ Դրանք հասանելի են ԱՆԻՖ-ի կայքում։ 

ԱՆԻՖ-ի սեփական կապիտալն այս պահին կազմում է 6 միլիարդ 883 միլիոն դրամ (17,8 միլիոն ԱՄՆ դոլար), իսկ անցած մեկ տարվա ընթացքում գրանցած զուտ շահույթը՝ ավելի քան 1 միլիարդ 760 միլիոն դրամ( մոտ 4,6 միլիոն ԱՄՆ դոլար)։

Ի թիվս այլ արդյունքների, գնահատման համաձայն, 2022 թվականի հուլիսին գործարկումից ի վեր ԱՆԻՖ-ի և Էյր Արաբիա ընկերության համատեղ ձեռնարկության՝ ազգային ավիափոխադրող Ֆլայ Արնա ընկերության բաժնետոմսերի շուկայական արժեքը էական աճ է գրանցել` հասնելով մոտ 27 միլիոն ԱՄՆ դոլարի, զգալի տնտեսական արդյունք գրանցելով ԱՆԻՖ-ի միակ բաժնետեր Հայաստանի Հանրապետության համար։ 

ԱՆԻՖ-ի գործադիր տնօրեն Դավիթ Փափազյանը, մեկնաբանելով այս արդյունքները, նշել է. «Իր գոյության ընդամենը 3,5 տարում, որի ընթացքում Հայաստանն անցել է բազմաթիվ փորձություններով, ԱՆԻՖ-ը գրանցել է զուտ շահույթ։ Արաբական Միացյալ Էմիրությունների Մասդար ընկերության  հետ մեր համատեղ ծրագրի՝ «Այգ-1» 200 Մվտ հզորության արևային կայանի շինարարությունը նախատեսում ենք սկսել այս տարեվերջին, ինչը կլինի ԱՆԻՖ-ի այս տարվա ևս մեկ ձեռքբերումը։ Մենք ակնկալում ենք տեղական և արտասահմանյան գործընկերների հետ արդյունավետ համագործակցության շարունակություն՝ նպաստելով Հայաստանի տնտեսության ամրապնդմանը և դիվերսիֆիկացիային»։