Yandex Go-ն Հայաստանում սկսում է անվճար ուղևորություններ տրամադրել բարեգործական կազմակերպություններին

Yandex Go-ն Հայաստանում մշտական սոցիալական ծրագիր է մեկնարկում: Տաքսին հասանելի կլինի խնամակալության տակ գտնվող անձանց և նրանց աջակցող մասնագետներին։ Բարեգործական ուղևորությունների ծրագիրը մշտական բնույթ է կրելու։ Առայժմ դրանում ներառված է 4 կազմակերպություն։

«Ծրագրի մեկնարկին ընդառաջ՝ մենք խորհրդակցել ենք կազմակերպությունների հետ՝ ճշտելու ուղևորափոխադրումների նրանց կարիքները, սակագները։ Նախաձեռնության մեկնարկային բյուջեն 680 հազար դրամ է։ Անհրաժեշտության դեպքում կարող ենք բարձրացնել սահմանաչափը, որպեսզի բավարարի հիմնադրամների կարիքներին», – ասում է Yandex Go-ի միջազգային շուկաների սոցիալական նախագծերի ղեկավար Սվետլանա Վորոնինան։

Ծրագրի կարևորությունը ներառականությունն է։ Սա ընդհանուր կարծիք ու նպատակ է, որը միավորում է նախագծում ներառված կազմակերպություններին։

«Կան երեխաներ, որոնք բուժումների ու պարապմունքների գալու հնարավորություն չունեն՝ հեռու համայնքերում ապրելու և հնարավորության սղության պատճառով։ Այնպես որ այդ հնարավորության ընձեռման համար շնորհակալ ենք Yandex Go-ին», – ասում է «Շտապիր դեպի բարին» հիմնադրամի նախագահ Ելենա Հակոբյանը։

«Սա շատ կարևոր քայլ է, որովհետև մեծ ռեզոնանս կարող է ունենալ։ Այժմ շատերը ուզեն, թե չուզեն, հավելվածում կտեսնեն, որ իրենց մեքենան կարող են պատվիրել նաև հատուկ կարիքներ ունեցող մարդիկ, առնվազն կիրազեկվեն, որ այդ մարդիկ էլ են տնից դուրս գալիս», – կարծում է «Հայ մայրեր» բարեգործական ՀԿ հիմնադիր Նարինե Մանուկյանը։

Նախաձեռնությամբ ոգևորված է նաև ՀՀ Էկոնոմիկայի նախարարությունը։

«Էկոնոմիկայի նախարարությունը անխոս ողջունում է այս նախաձեռնությունը  և մենք միանշանակ աջակցում ենք ներառական ֆորմատի ցանկացած մոտեցում, բոլորիս հայտնի է, որ այն սատարում է տնտեսության զարգացմանը: Ողջունելի է, որ Yandex Go-ն կարևորություն և տնտեսական նպատակահարմարություն է տալիս նման ձեռնարկատիրական գործունեությանը և, ինչպես տեսնում ենք, կիրառում է ներառական բիզնես մոդել:

Բիզնեսի նմանօրինակ ռազմավարությունը խթանում և ստեղծում է հավասար հնարավորություններ բնակչության խոցելի հատվածի համար՝ ապահովելով տնտեսության գործունեության բոլոր մասնակիցների համար փոխշահավետ պայմաններ», – նկատում է ՀՀ Էկոնոմիկայի նախարարության ռազմավարական ոլորտների վարչության պետ Արևիկ Մարգարանը։

Բարեգործական ուղևորությունները կատարվելու են մարդատար մեքենաներով՝ Ստարտ, Էկոնոմ, Կոմֆորտ և Կոմֆորտ+ սակագներով։ Սակայն բարեգործական ծրագրից դուրս ևս Yandex Go-ն կարևորում է ներառականությունը։ Հավելվածում այլևս հասանելի է հատուկ հնարավորությունների էկրանը, որտեղ ներկայացված են տարբերակներ հաշմանդամություն ունեցող օգտատերերի համար։

«Մեզ համար կարևոր է, որ Yandex Go-ն հարմարավետ լինի տարբեր կարիքներ ունեցող օգտատերերի համար։ Օրինակ՝ պատվեր գրանցելիս արդեն հասանելի են հատուկ հնարավորությունները. կարող եք նշել, որ ուղևորն անվասայլակով է կամ լսողական խնդիր ունի։ Վարորդը կտեսնի այդ տեղեկությունը և կկարողանա օգնել», – Հայաստանում Yandex Go-ի տարածաշրջանային մենեջեր Բագրատ Եղիազարյանի խոսքով՝ արդեն շոշափելի արդյունքներ ունեն այս թարմացման շրջանակում:

Այս գործիքից հիմնականում օգտվում են Երևանում՝ 78%, այնուհետև Արարատի մարզն է. Ամենանախընտրելի սակագինը Ստարտն է։ Վարորդների 78%-ն ասում է, որ պատրաստ է պատվեր ընդունել հատուկ կարիքներ ունեցող ուղևորներից, իսկ այս խմբի վարորդների 77%-ը նաև վստահաբար գիտի՝ ինչպես է ճիշտ վարվել հատուկ կարիքներ ունեցող ուղևորների հետ։ Այնպես որ, Yandex Go-ի միջազգային շուկաների սոցիալական նախագծերի ղեկավար Սվետլանա Վորոնինայի ուշադրությունից չի վրիպել հայ վարորդների բացառիկ պատրաստակամությունը կատուկ կարիքներ ունեցող ուղևորներին օգնելու հարցում։

«Մեկ ամսում առավել քան 2000 ուղևորություն է եղել հատուկ հնարավորությունների էկրանի կիրառմամբ ամրագրված։ Իրականում սա լուրջ ցուցանիշ է։ Հաճելի է, երբ մարդիկ անտարբեր չեն, մինչդեռ ոչ բոլոր երկրները կարող են դրանով պարծենալ»։

Եվ այսպես, Yandex Go-ն դառնում է առավել հարմարավետ՝ ընդարձակելով մատուցվող ծառայությունները և լավացնելով դրանց մատուցման որակը։ Իսկ բարեգործական ծրագրում ներառված կազմակերպությունների ցանկը կվերանայվի՝ ավելացման միտումով, չէ՞ որ փոխադրումներն անհրաժեշտություն են, ուրեմն պետք է հասանելի է լինել անխտիր բոլորին։

Աղբյուրը`   b24.am