Շահումով խաղերի յուրաքանչյուր մասնակից իր խաղային հաշիվը կկարողանա լիցքավորել միայն իրեն պատկանող բանկային կամ քարտային հաշվից․ նախագիծ
Երկրորդ ընթերցմամբ Հայաստանի խորհրդարանի քննարկմանն է ներկայացվել «Շահումով խաղերի, ինտերնետ շահումով խաղերի եւ խաղատների մասին» օրենքում լրացում կատարելու մասին նախագիծը, որով առաջարկվում է սահմանել, որ շահումով խաղերի մասնակցող յուրաքանչյուր անձ կարող է իր խաղային հաշիվը լիցքավորել միայն իրեն պատկանող բանկային կամ քարտային հաշվից: «Արմենպրես»-ի հաղորդմամբ՝ այս մասին ասաց ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գևորգ Պապոյանը, ներկայացնելով օրենքի նախագիծը։
«Առաջինից երկրորդ ընթերցման ընթացքում հանձնաժողովում տեղի է ունեցել հեղինակների և հանձնաժողովների անդամների մասնակցությամբ աշխատանքային քննարկում, որին մասնակցել են մի շարք գերատեսչությունների, մասնավորապես ֆինանսների, էկոնոմիկայի, պաշտպանության նախարարությունների ներկայացուցիչների, կենտրոնական բանկի ներկայացուցիչների, մասնավոր սեկտորի և ոլորտում ներգրավված բոլոր ընկերությունների ղեկավար կազմի ներկայացուցիչների մասնակցությամբ։ Քննարկումների արդյունքում որոշակի պայմանավորվածություններ ենք ձեռք բերել, և իմ կողմից առաջարկներ են եղել»,- ասաց Պապոյանը։
Պապոյանը ներկայացրեց իր կողմից ներկայացված երեք առաջարկները։
«Առաջին հերթին առաջարկել ենք հետաձգել օրենքի ուժի մեջ մտնելու ժամկետը։ Այն ուժի մեջ կմտնի 2024 թվականի ապրիլի 1-ից, որովհետև բանկային համակարգը և բիզնեսը պետք է ներդրումներ անեն դրա համար և տեխնիկական լուծումներ պետք է տան, որը ժամանակ է պահանջում։
Երկրորդ առաջարկով հստակ սահմանել ենք, որ խաղերի կազմակերպիչները հարցումներ են անում բանկերին և բանկերը պարտավոր են տալ տվյալներ։ Այսինքն՝ հստակեցրել ենք, թե ով և ինչ պատասխանատվություն ունի և ինչ իրավունք ունի այս գործընթացում։
Երրորդ առաջարկն այն է, որ ոչ Հայաստանի Հանրապետության քաղաքացիներին այս օրենքի նախագիծը չի վերաբերվի։ Այն վերաբերվելու է միայն Հայաստանի Հանրապետության քաղաքացիներին»,- ասաց Պապոյանը։