Ճապոնիայում նախատեսել են բնակչությանն ու տնտեսությանը աջակցելու համար մոտ 113.1 մլրդ դոլար հատկացնել
Ճապոնիայի իշխանությունները նախատեսում են ընդունել բնակչությանն աջակցելու և տնտեսության խթանման ծրագիր՝ մոտ 17 տրիլիոն իենի (մոտ 113.1 միլիարդ դոլար) չափով։ Այս մասին հայտարարել է Ճապոնիայի վարչապետ Ֆումիո Կիսիդան կառավարության և իշխող Լիբերալ-դեմոկրատական կուսակցության անդամների հետ հանդիպմանը։
Սպասվում է, որ օգնության փաթեթը կհաստատվի օրվա ընթացքում՝ կառավարության նիստում։ Ծրագրի մանրամասների մասին կառավարության ղեկավարը կխոսի հաջորդ ասուլիսում։
Ըստ Kyodo գործակալության՝ հատկացված միջոցները կօգտագործվեն Ճապոնիայում գների աճից տուժած ցածր եկամուտ ունեցող ընտանիքների համար նպաստներ վճարելու, կիսահաղորդիչների արտադրության մեջ ներդրումների խթանման և բնական աղետների կանխարգելման համար։ Միաժամանակ կառավարությունն ակնկալում է աջակցության միջոցառումների շրջանակում ֆինանսավորում տրամադրել պետական պարտատոմսերի թողարկման միջոցով։
Աղբյուրը՝ b24.am