Կոտայքի մարզում ակտիվ ընթանում են կառավարության սուբվենցիոն ծրագրերով իրականացվող աշխատանքները
Կոտայքի մարզի տարբեր համայնքներում և բնակավայրերում ակտիվ ընթանում են կառավարության սուբվենցիոն ծրագրերով իրականացվող աշխատանքները:
Ըստ ՀՀ տարածքային կառավարման և ենթակառուցվածքների նախարարության հաղորդագրության, 2023 թվականին համայնքների սոցիալական և տնտեսական զարգացմանն ուղղված կառավարության երեք սուբվենցիոն ծրագիր է հաստատվել Աբովյան համայնքում:
Առաջին ծրագրով ավելի քան 140 մլն դրամ է ներդրվել քաղաքի Զ. Անդրանիկ և Է. Ավագյան փողոցները միմյանց կապող սանդուղքի հիմնանորոգման նպատակով: Աստիճանները հիմնովին քանդվել են և վերակառուցվում են նոր, հարմարավետ, ժամանակակից պայմաններով: 130մ երկարությամբ և 10 մետր լայնությամբ սանդուղքի մեջտեղի հատվածը լինելու է կանաչապատ տարածք, կառուցվում է նորմատիվներին համապատասխան թեքահարթակ՝ սահմանափակ կարողություններով և հաշմանդամ անձանց տեղաշարժը դյուրին դարձնելու նպատակով:
Սանդուղքը կառուցվում է կառավարության 35% և համայնքային 65% ֆինանսավորմամբ:
Աշխատանքների ավարտը նախատեսված է նոյեմբերի վերջին:
Ընդգծենք, որ քաղաքի համար կարևոր նշանակություն ունեցող սանդուղքը խորհրդային տարիներին էր կառուցվել, սակայն ոչ լիարժեք, ու անկախացումից հետո այն առաջին անգամ հիմնովին նորոգվում է կառավարության և համայնքի համատեղ ներդրմամբ:
Կառավարության 2023 թվականի մեկ այլ սուբվենցիոն ծրագրի շրջանակում Աբովյան համայնքի Արամուս, Առինջ, Բալահովիտ, Գետարգել, Գեղաշեն, Կամարիս, Կաթնաղբյուր, Մայակովսկի, Պտղնի, Վերին Պտղնի բնակավայրերում կատարվել են ճանապարհաշինական ծավալուն աշխատանքներ:
Ընդհանուր առմամբ, բարեկարգվել, հիմնանորոգվել և ասֆալտապատվել է շուրջ 10 կմ երկարության ներհամայնքային ճանապարհահատված: Ծրագրի արժեքը 841 263 756 դրամ է, որից 292 289 981 դրամը (35%) կառավարության բյուջեի ներդրման չափն է, իսկ 545 973 775 դրամը (65%)՝ համայնքի ներդրումը:
Առինջ և Արամուս բնակավայրերում աշխատանքները դեռ շարունակվում են:
Աբովյան քաղաքի Հատիս փողոցի նոր թաղամասում, Առինջում, Արամուսում, Մայակովսկիում և Պտղնիում էլ կառուցվել են լուսավորության համակարգեր:
Սուբվենցիոն ծրագրի շրջանակում կառուցվել է շուրջ 5900 գծամետր լուսավորության համակարգ:
Ծրագրի արժեքը 29 477 513 դրամ է, որից 13 240 636 դրամը (45%) կառավարության բյուջեից ֆինանսավորման չափն է, իսկ 16 236 877 դրամը (55%)՝ համայնքի ներդրումը: Աշխատանքներն ավարտված են:
Աբովյան համայնքի Բալահովիտ բնակավայրում էլ 2022 թվականի սուբվենցիոն ծրագրով՝ 158 մլն. դրամ արժեքով, կառավարության 70% (110 600 000 դրամ) և համայնքի 30% (47 400 000 դրամ) համաֆինանսավորմամբ հիմքից կառուցվում է 70 երեխայի համար նախատեսված մանկապարտեզ: Այս բնակավայրում երբևէ մանկապարտեզ չի գործել:
Մանկապարտեզի կառուցման աշխատանքների ավարտը նախատեսված է տարեվերջին:
