Ղազախստանը նախատեսում է մինչև 2029-ը ներգրավել առնվազն 150 միլիարդ դոլարի օտարերկրյա ներդրումներ
Ղազախստանի իշխանությունները նախատեսում են մինչև 2029-ը երկրի տնտեսություն ներգրավել առնվազն 150 միլիարդ դոլարի օտարերկրյա ներդրումներ: Այս մասին հայտարարել է հանրապետության վարչապետ Ալիխան Սմաիլովը՝ Ղազախստանի համաշխարհային ներդրումների կլոր սեղանի ժամանակ։
«Ղազախստանի ժողովրդին ուղղված իր վերջին ուղերձում մեր նախագահ Կասիմ-Ժոմարտ Տոկաևը հայտարարեց նոր տնտեսական մոդելի անցնելու անհրաժեշտության մասին։ Կառավարությանը տրվել է լայնածավալ խնդիր՝ մինչև 2029 թվականը տնտեսության չափը հասցնել 450 միլիարդ դոլարի, այսինքն՝ երկու անգամ ավել»,- ասել է ղազախ պաշտոնյան:
Նախարարների կաբինետի ղեկավարը նշել է, որ ներդրումների ներգրավումը հանրապետության տնտեսության աճի առանցքային գործոն է։ Նրա խոսքով՝ երկրի իշխանությունները շարունակում են նպաստավոր պայմաններ ստեղծել ներդրողների համար, այդ թվում՝ կատարելագործելով ներդրումների աջակցության գործիքները։
Աղբյուրը՝ b24.am