Վերապատրաստման դասընթացներ անձի ֆունկցիոնալության ճշգրիտ գնահատման գործընթացում որակյալ մասնագետների ներգրավման նպատակով

Կարևորելով հաշմանդամության սահմանման գործում անձի ֆունկցիոնալության ճշգրիտ գնահատման գործընթացում որակյալ մասնագետների ներգրավումը՝ Աշխատանքի և սոցիալական հետազոտությունների ազգային ինստիտուտի կողմից շարունակվում են վերապատրաստման դասընթացները։

Ըստ ՀՀ աշխատանքի և սոցիալական հարցերի նախարարության հաղորդագրության, անձի ֆունկցիոնալության գնահատման հարթակում հաշվառված շուրջ 40 բժիշկ և հարբժշկական ծառայություններ մատուցող մասնագետներ դասընթացներին ծանոթացել են հաշմանդամություն ունեցող անձանց ոլորտում իրականացվող բարեփոխումներին, հաշմանդամության սահմանման նոր մոդելին, ինչպես նաև կատարել գործնական աշխատանքներ։

Դասընթացների ավարտից հետո մասնակիցները կհանձնեն քննություն և հաջողությամբ հանձնածները կներառվեն անձի ֆունկցիոնալության գնահատման համակարգի մասնագետների ռեեստրում։

Վերապատրաստումներն իրականացվել են ՄԱԿ֊ի զարգացման ծրագրի (UNDP) և ՄԱԿ֊ի մանկական հիմնադրամի (UNICEF) աջակցությամբ։