Ռաֆայել Գևորգյանը կորեական «SK Ecoplant» ընկերության պատվիրակության հետ քննարկել է տնտեսական համագործակցության հեռանկարները

ՀՀ էկոնոմիկայի նախարարի տեղակալ Ռաֆայել Գևորգյանը նոյեմբերի 24-ին ընդունել է կորեական խոշորագույն «SK Group» հոլդինգի մաս կազմող «SK Ecoplant» ընկերության գլխավոր գործադիր տնօրեն Պակ Կյուն-իլի գլխավորած պատվիրակությանը՝ հայ-կորեական տնտեսական համագործակցության հեռանկարները քննարկելու նպատակով:

Ըստ ՀՀ էկոնոմիկայի նախարարության հաղորդագրության, հանդիպման սկզբում պատվիրակությունը շնորհակալություն է հայտնել ընդունելության համար և հետաքրքրվել է նախարարության համակարգման ոլորտներում իրականացվող ծրագրերով և դրանցում կորեական ընկերությունների ներգրավման հնարավորությամբ:

Հանդիպմանը քննարկվել են համագործակցության հնարավորությունները շրջակա միջավայրի պահպանության և վերականգնվող էներգետիկայի, մասնավորապես՝ թափոնների և կեղտաջրերի հեռացման կառավարման, Էլեկտրական մեքենաների մարտկոցների և պլաստիկի վերամշակման, քամու և արևային էներգիայի արտադրության ուղղությամբ։

Ռաֆայել Գևորգյանը հյուրերին ներկայացրել է տնտեսության ոլորտում ՀՀ կառավարության առաջնահերթություններն ու միջազգային տարբեր կառույցների հետ իրականացվող ծրագրերը, ինչպես նաև Կառավարության «Խաղաղության խաչմերուկ» նախագիծը և հավելել, որ հրավիրում է կորեական կողմին համագործակցել այս նախագծի շրջանակում նախատեսվող շինարարական աշխատանքներում։