ԱՄՆ-ում նկատել են, որ միկրոսխեմաներ արտադրողները գոհ չեն Չինաստանի դեմ պատժամիջոցներից

Ոչ բոլոր ամերիկյան միկրոսխեմաներ արտադրողներն են գոհ Պեկինի նկատմամբ Վաշինգտոնի կողմից սահմանված պատժամիջոցներից, քանի որ սահմանափակումները հանգեցնում են շահույթի կորստի։ Այս մասին Կալիֆորնիայում Ռոնալդ Ռեյգանի նախագահական հիմնադրամի կազմակերպած ֆորումի ժամանակ հայտարարել է ԱՄՆ առևտրի նախարար Ջինա Ռայմոնդոն։

«Ես գիտեմ, որ այստեղ կան միկրոսխեմաներ արտադրող ընկերությունների ղեկավարներ, որոնք զայրացած են իմ արածից, քանի որ շահույթ են կորցնում: Բայց դա կյանքն է: Ազգային անվտանգության պաշտպանությունն ավելի կարևոր է, քան կարճաժամկետ շահույթը», – ասել է պաշտոնյան:

Նախարարն ասել է, որ ընդհանուր առմամբ այս ոլորտի ներկայացուցիչները «համագործակցում և օգնում են» իր ղեկավարած գերատեսչությանը, բայց ինքն ընդունում է որոշ խնդիրների առկայությունը։

«Մենք լավ հարաբերություններ ունենք: Բայց, իհարկե, կա որոշակի բնական լարվածություն: Սա առաջին դեպքն է, երբ մենք մի ամբողջ երկրի, այսինքն՝ Չինաստանին զրկում ենք կիսահաղորդիչների և սարքավորումների հասանելիությունից: Մենք կշարունակենք աշխատել այս ուղղությունը», – խոստովանել է նախարարը:

Ռայմոնդոն նաև մտահոգություն է հայտնել, որ եթե Ճապոնիան և Նիդեռլանդները, որոնց գործարանները առաջատար դիրքեր են զբաղեցնում կիսահաղորդչային սարքավորումների արտադրության ոլորտում, շարունակեն մատակարարումները դեպի Չինաստան, ապա ԱՄՆ-ի սահմանափակող միջոցները որևէ իմաստ չեն ունենա։ Այդ իսկ պատճառով նա հայտարարել է Չինաստանի դեմ պատժամիջոցների հարցում նրանց հետ համագործակցելու անհրաժեշտության մասին։

Աղբյուրը՝   b24.am