ԱՆԻՖ-ը ամանորյա անակնկալ նվեր է մատուցել արցախցի երեխաներին
Հայաստանի պետական հետաքրքրությունների ֆոնդը, (ԱՆԻՖ) որպես սոցիալական պատասխանատվության հանձնառության մաս, ֆոնդի ծրագրերից մեկի՝ «Այգ-1» արևային կայանի ազդակիր համայնքներում բնակվող արցախցի երեխաների համար այց էր կազմակերպել Երևան։
ԱՆԻՖ-ից հայտնում են, որ Արաբական Միացյալ Էմիրությունների Մասդար ընկերության հետ համատեղ իրականացվող «Այգ-1» արևային ֆոտովոլտային կայանի շրջակա համայնքներում, մասնավորապես՝ Թալին խոշորացված համայնքում, բնակություն հաստատած 11-17 տարեկան 50 արցախցի երեխա դեկտեմբերի 20-ին այցելել է մայրաքաղաք։ Նրանց համար շրջայց է կազմակերպվել Երևանում։
Այնուհետև երեխաները հյուրընկալվել են ԱՆԻՖ- ի «Ձեռնարկատեր + պետություն» ներդրումային ֆոնդի և «Դոմ Արենա» ընկերության համատեղ՝ «Հարդ Ռոք կաֆե» ռեստորանում, համտեսել են սրճարանի բրենդային կերակուրները, մասնակցել են իրենց համար կազմակերպված ամանորյա ծրագրին:
Հագեցած օրվա ավարտին, ԱՆԻՖ-ի «Ձեռնարկատեր + պետություն» ֆոնդի մեկ այլ համատեղ նախագծի` «Բերրիմաունթ» ընկերությունից, երեխաները ստացել են նվերների տոպրակներ` ընկերության ջերմոցներում արտադրվող ելակներ և այլ քաղցրավենիք։ ԱՆԻՖ-ի մեկ այլ նախագծի՝ «Ֆլայ Արնա» հայկական ազգային ավիաընկերության կողմից նվեր են ստացել գրենական պիտույքներ:
