Իտալիայում կարծում են, որ իրավիճակը Կարմիր ծովում կարող է հանգեցնել տնտեսական ճգնաժամի

Իտալիայի պաշտպանության նախարար Գիդո Կրոզետտոն կարծում է, որ իրավիճակը Կարմիր ծովում, որտեղ Եմենի ապստամբ «Անսար Ալլահ» շարժման զինված կողմնակիցները ակտիվացել են, կարող է տնտեսական ճգնաժամ առաջացնել։

«Ես ահազանգեցի և հայտնեցի իմ մտահոգությունները երկու շաբաթ առաջ, և, ցավոք, դրանք ճիշտ են, քանի որ նավերն այլևս չեն անցնում Կարմիր ծովով, ուստի ծախսերն ավելանում են, քանի որ նրանք պետք է շրջեն Աֆրիկայում, բարձրանում են նաև ապահովագրության ծախսերը: Հետևանքները հետո կզգան բոլորը, այդ թվում՝ ապրանքների ինքնարժեքի և էլեկտրաէներգիայի վճարների տեսքով։ Այդ իսկ պատճառով մենք պետք է քայլեր ձեռնարկենք, քանի որ չենք կարող մեզ թույլ տալ տնտեսական հերթական ճգնաժամը», – ասել է իտալացի պաշտոնյան:

Հիշեցնենք՝ դեկտեմբերի 20-ին ԵՄ դիվանագիտության ղեկավար Ժոզեպ Բորելը հայտարարել էր, որ ԵՄ անդամ երկրները որոշել են մասնակցել ԱՄՆ-ի Prosperity Guardian գործողությանը` ապահովելու նավարկության ազատությունը և Կարմիր ծովում նավերի պաշտպանությունը: Սակայն դեկտեմբերի 22-ին El Confidencial թերթը հայտնեց, որ պաշտոնական Մադրիդը վետո է դրել ամերիկյան գործողությանը եվրոպական մասնակցության վրա։

Աղբյուրը՝   b24.am