Apple-ի էլեկտրական մեքենան կթողարկվի 2028թ.-ին
Apple-ը մեղմացրել է իր հավակնությունները՝ կապված Apple Car-ի թողարկման հետ: Եթե ի սկզբանե ընկերությունը պատրաստվում էր թողարկել ամբողջովին անօդաչու մեքենա, ապա այժմ Apple-ի ծրագրերը ներառում են ավելի ավանդական էլեկտրական մեքենա՝ միայն վարորդի աջակցության առաջադեմ համակարգով: Բացի այդ, Apple-ը կրկին հետաձգեց նախագծի ժամկետները։
Apple-ի էլեկտրական մեքենաների նախագիծը՝ Project Titan-ը, սկսվել է 2014թ.։ Մեքենայի թողարկման ժամկետն արդեն բազմիցս հետաձգվել է, նախագծի ղեկավարները մի քանի անգամ փոխվել են, ինչպես նաև կրճատումներ մշակողների թիմում և փոխվել է ռազմավարությունը։ 2021թ. նախագիծը սկսեց ղեկավարել Apple-ի փոխնախագահ Քևին Լինչը, սակայն ռազմավարության հերթական փոփոխությունից խուսափել չհաջողվեց։
Սկզբում Apple-ը նախատեսում էր թողարկել ամբողջովին ինքնակառավարվող մեքենա. նրա հինգերորդ մակարդակի ավտոմատ օդաչու համակարգը պետք է թույլ տար օգտվողներին ընդհանրապես չմասնակցել մեքենան վարելուն: 2022թ. վերջին հաղորդվեց, որ ընկերությունը մտադիր է այն թողարկել մինչև 2026թ.՝ ավտոմոբիլային առաջադեմ գործառույթներով, այսինքն՝ 3-րդ մակարդակի ավտոպիլոտով։
Այժմ, երբ պարզ է, որ Apple-ը մոտ ապագայում չի արտադրի նման մեքենա, ընկերությունն անցնում է վարորդին օժանդակող ավելի պարզ գործառույթների: Դրանք կհամապատասխանեն Tesla-ի ներկայիս էլեկտրական մեքենաների հնարավորություններին: Մեքենան կօգտագործի 2+ մակարդակ վարորդի աջակցության համակարգով։
Նոր ռազմավարությունն ընդունվել է մի շարք աշխատանքային հանդիպումներից հետո, որոնցում ներառվել են Apple-ի տնօրենների խորհրդի ներկայացուցիչներ, նախագծի ղեկավար Քևին Լինչը և ընկերության գլխավոր գործադիր տնօրեն Թիմ Կուկը։ Զրուցակիցների խոսքով՝ տնօրենների խորհուրդը մի քանի ամիս ճնշում է գործադրել Apple-ի ղեկավարության վրա՝ ավտոմեքենան թողարկելու ծրագրի վերաբերյալ։
Էլեկտրական մեքենայի ստեղծումը վերջին տասնամյակի մեծ մասի ընթացքում ընկերության ամենաթանկ գիտահետազոտական և զարգացման նախագծերից մեկն է եղել: Apple-ը տարեկան հարյուր միլիոնավոր դոլարներ է ծախսում աշխատավարձերի, ամպային համակարգերի վրա՝ Autopilot համակարգը վերահսկելու, փակ ճանապարհների վրա փորձարկումների և մեքենայի մասերի ու չիպերի մշակման համար: Apple-ը տարիներ է ծախսել շարժիչային սարքերի, ինքնակառավարվող սարքավորումների և ծրագրային ապահովման, մեքենաների ինտերիերի և էքստերիերի և այլ հիմնական բաղադրիչների մշակման վրա: Այնուամենայնիվ, մեքենան հաջողությամբ չի հասել նախատիպի փուլ: Ընկերության ղեկավարները հուսով են, որ դա վերջապես տեղի կունենա նոր մոտեցմամբ:
Project Titan-ի նախկին ղեկավար Դագ Ֆիլդը լքեց ընկերությունը 2021թ., մասամբ այն պատճառով, որ չէր հավատում, որ ղեկավարությունը երբևէ պաշտոնապես կհաստատի մեքենան: Նույնիսկ նոր ծրագրի դեպքում Apple-ի որոշ ղեկավարներ թերահավատ են, որ մեքենան երբևէ կբերի այնպիսի շահույթ, որը ընկերությունը ստանում է iPhone-ից: Այդուհանդերձ, 100,000 դոլար արժողությամբ մեքենան կխթանի եկամուտների աճը և կօգնի Apple-ին տեղ գրավել աճող էլեկտրական մեքենաների ոլորտում:
Մեքենայի նոր պլանը ներքուստ դիտարկվում է որպես Tesla-ի նման արտադրանք: Այն նոր հիմքեր չի ստեղծի, սակայն ընկերությունը հույս ունի, որ մեքենան կառանձնանա իր նրբագեղ դիզայնով, անվտանգության առանձնահատկություններով և եզակի ինտերֆեյսով:
Աղբյուրը՝ b24.am