Նախատեսվում է Երևանի համար ձեռք բերել 250 հատ 18–մետրանոց էլեկտրական ավտոբուս. Ավինյան
Երևանի քաղաքապետարանն այս տարի նախատեսում է ձեռք բերել 200 հատ 8,5 մետրանոց ավտոբուս։ Այս մասին այսօր ավագանու նիստի ժամանակ հայտարարեց Երևանի քաղաքապետ Տիգրան Ավինյանը։
Նա նշեց, որ ևս 250 18–մետրանոց էլեկտրական ավտոբուս էլ նախատեսվում է ձեռք բերել առաջիկայում։
Քաղաքապետարանն այս պահին բանակցություններ է վարում միջազգային ֆինանսական գործընկերների ու ՀՀ կառավարության հետ, որովհետև այս գործում կառավարության աջակցությունը, ըստ քաղաքապետի, նույնպես անհրաժեշտ է։
«էլեկտրական ավտոբուսների ծախսը անգամներով պակաս է գազով, դիզելով, բենզինով աշխատող ավտոբուսների ծախսից, բայց իրենց նախնական գնով ավելի թանկ են մյուս ավտոբուսներից։ Բայց 10 տարվա ամորտիզացիայի տրամաբանությամբ մենք ունենալու ենք մոտավոր նույն ծախսը։ Այնպես որ, բնապահպանական առումով ավելի լավ է էլեկտրականը»,– ասաց քաղաքապետը։
Նա հավելեց, որ քաղաքապետարանի նպատակն է առաջիկա 10 տարվա ընթացքում ունենալ ամբողջությամբ էլեկտրական շարժակազմ։
Աղբյուրը` armeniasputnik.am