Ռուբեն Վարդանյանը որևէ առնչություն չունի «Ամերիաբանկ»-ի հնարավոր վաճառքի հետ․ Մեսրոպ Առաքելյան
«Ապրելու երկիր» կուսակցության անդամ Մեսրոպ Առաքելյանը մեկնաբանել է շրջանառվող խոսակցություններն «Ամերիաբանկ»-ի հնարավոր վաճառքի հետ Լեռնային Ղարաբաղի նախկին պետնախարար Ռուբեն Վարդանյանի կապ ունենալու մասին։
Մեսրոպ Առաքելյանը Ֆեյսբուքի իր էջում գրել է, որ Ռուբեն Վարդանյանը որևէ առնչություն չունի «Ամերիաբանկ»-ի հնարավոր վաճառքի հետ։
«Հաշվի առնելով «Ամերիաբանկ»-ի հնարավոր վաճառքի հետ կապված Ռուբեն Վարդանյանի մասով հերթական ավելորդ շահարկումները՝ հարկ եմ համարում տեղեկացնել հետևյալը, որը հասանելի է բոլորին․
Ռուբեն Վարդանյանը անձամբ չի հանդիսանում «Ամերիաբանկի բաժնետեր։
Ռուբեն Վարդանյանի 48,8 % բաժնեմասը կառավարման է հանձնված «Իմաստ գրուպ» ընկերությանը։ Ոչ մի բաժնետեր իրավասու չէ նման հարցերի շուրջ միայնակ որոշում կայացնել:
Ռուբեն Վարդանյանը վաղուց չի զբաղվել բանկի կառավարմամբ՝ դուրս գալով բանկի խորհրդի կազմից։
Բանկի հնարավոր վաճառքի շուրջ քննարկումները սկսվել են դեռևս 2022թ․-ին։
Բանկի վաճառքի հնարավոր գործարքը պետք է ստանա Հայաստանի Հանրապետության պետական մարմինների հաստատումը։
Կարճ ասած՝ Ռուբեն Վարդանյանը որևէ առնչություն չունի բանկի հնարավոր վաճառքի հետ»,- գրել է Առաքելյանը։
Փետրվարի 19-ին «Ամերիաբանկ»-ը հաղորդագրություն տարածեց՝ հայտնելով, որ «Ամերիաբանկ»-ը և Bank of Georgia Group-ը համաձայնության են հասել համաձայնություն են ձեռք բերել Միացյալ Թագավորությունում (ՄԹ) գրանցված BOGG միջազգային ֆինանսական խմբում Ամերիաբանկի ինքնուրույն լիիրավ անդամ դառնալու շուրջ: Գործարքի համաձայն` Խումբը կդառնա Ամերիաբանկի հիմնական բաժնետեր: Բանկում իր բաժնեմասնակցությունը 10%-ի չափով կպահպանի նաև Վերակառուցման և Զարգացման Եվրոպական Բանկը (ՎԶԵԲ)։ ՄԹ գործող ընթացակարգի համաձայն՝ ՄԹ Ֆինանսական ծառայությունների վերահսկող մարմինը (Financial Conduct Authority, FCA) հաստատել է ֆինանսական գործարքի շրջաբերականը։ Որպես հաջորդ քայլ` գործարքը պետք է հաստատվի կողմերի ընդհանուր բաժնետերերի ժողովների, ինչպես նաև հավանության արժանանա կարգավորող մարմինների՝ ներառյալ ՀՀ Կենտրոնական բանկի կողմից։
Ադրբեջանի սահմանապահ ծառայության զինծառայողները 2023 թվականի սեպտեմբերին 27-ին Լաչինի միջանցքում ապօրինի ձերբակալել էին Լեռնային Ղարաբաղի նախկին պետնախարար Ռուբեն Վարդանյանին և նրան տեղափոխել Բաքու։ Ավելի ուշ Բաքվի դատարանը Վարդանյանին կալանավորելու որոշում էր կայացրել։ Բաքվում Վարդանյանին կեղծ մեղադրանքներ են առաջադրել «ահաբեկչության ֆինանսավորման, զինված ստորաբաժանումներ և/կամ խմբեր ստեղծելու ու դրանց մասնակցելու, ինչպես նաև Ադրբեջանի Հանրապետության պետական սահմանը ապօրինի հատելու» հոդվածներով։