Երևանում գործող շրջիկ առևտրի իրավակարգավորումները կկիրառվեն նաև մյուս համայնքներում

Նախագծերի փաթեթի հիմնական նպատակն է շրջիկ առեւտրի պահանջարկի բարելավումը, շրջիկ առեւտրի կետերի շրջանառության բարձրացումը, համապատասխանաբար նաեւ համայնքներում տեղական տուրքերի մուտքերի ավելացումը, ինչպես նաեւ զբոսաշրջության զարգացմանը նպաստելը: Այս մասին ասել է ՀՀ տարածքային կառավարման եւ ենթակառուցվածքների նախարարի տեղակալ Վաչե Տերտերյանը: 

Առեւտրի եւ ծառայությունների մասին» օրենքում փոփոխություններ կատարելու մասին» եւ կից ներկայացված օրենքների նախագծերի փաթեթը քննարկվել է ՀՀ ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի՝ մարտի 13-ի նիստում:

Վաչե Տերտերյանի խոսքով դեռեւս մեկուկես տարի առաջ ընդունվել է Երեւան քաղաքում շրջիկ առեւտրի կանոնակարգմանը վերաբերող օրենսդրական փաթեթը: «Եվ որոշում է կայացվել Երեւանում կիրարկելուց հետո՝ աշխատունակ լինելու դեպքում, այն տարածել նաեւ մյուս համայնքների վրա»,- մանրամասնել է ՀՀ տարածքային կառավարման եւ ենթակառուցվածքների նախարարի տեղակալը: Քննարկված օրենքների նախագծերի փաթեթով նախատեսվում է Երեւանում գործող շրջիկ առեւտրին վերաբերող իրավակարգավորումները կիրառելի դարձնել նաեւ մյուս համայնքներում: Վաչե Տերտերյանը, պատասխանելով պատգամավորների հարցերին, ներկայացրել է պարզաբանումներ շրջիկ առեւտրով զբաղվող անձանցից առգրավված ապրանքների ճակատագրի, փողոցային առեւտրի վերաբերյալ: Ըստ հիմնական զեկուցողի՝ օրենքի ճիշտ կիրարկման եւ պատշաճ վարչարարության պարագայում փողոցային առեւտրի ծավալներն էապես կնվազեն:

Նրա դիտարկմամբ նկատվում է փողոցային առեւտրի ծավալների նվազման միտում: Օրենքների նախագծերի փաթեթը ստացել է դրական եզրակացություն: Հանձնաժողովը կիրականացնի արտագնա նիստեր: