Արագածոտնի մարզպետ Սերգեյ Մովսիսյանն անցկացրեց աշխատանքային հերթական խորհրդակցությունը
Արագածոտնի մարզպետի աշխատակազմի ղեկավար կազմի մասնակցությամբ այսօր մարզպետ Սերգեյ Մովսիսյանի մոտ տեղի ունեցավ աշխատանքային խորհրդակցություն, որի ընթացքում ոլորտային պատասխանատուները զեկուցեցին մարզում իրականացվող զարգացման ծրագրերի ընթացիկ աշխատանքների մասին։ Այս մասին տեղեկացնում են Արագածոտնի մարզպետի աշխատակազմից։
Ողջունելով ներկաներին՝ մարզպետը ներկայացրեց անձնակազմի կառավարման, փաստաթղթաշրջանառության և հասարակայնության հետ կապերի վարչության նորանշանակ պետ Արամ Առաքելյանին և նրան արդյունավետ գործունեություն մաղթեց։
Հաջորդիվ զեկուցվեցին ճանապարհաշինությանը, սուբվենցիոն ծրագրերին, ՏԻՄ ֆինանսական, կրթության, մշակույթի, սպորտի ոլորտներին առնչվող հարցեր։
Խորհրդակցությանն առանձնահատուկ անդրադարձ կատարվեց գյուղատնտեսական պետական աջակցության ծրագրերին, մասնավորապես, ընդգծվեց գյուղատնտեսական սեզոնի ակտիվացմանը զուգահեռ բուսաբուծության ծրագրի իրականացման գործընթացի վրա կենտրոնանալու կարևորությունը, ինչպես նաև խոսվեց ոռոգման սեզոնի նախապատրաստական աշխատանքների մասին։
Հաջորդիվ հանգամանալից անդրադարձ եղավ դպրոցաշինական, մասնավորապես պետական և մարզպետի աշխատակազմի նախաձեռնությամբ ընթացող ծրագրերին։
Ստորաբաժանման ղեկավարները մարզպետից ստացան հանձնարարականներ։