Մարզպետ Սեդրակ Թևոնյանը այցելել է Մասիս համայնքի Հովտաշատի և Հայանիստի միջնակարգ դպրոցների կառուցման շինհրապարակներ

Արարատի մարզպետ Սեդրակ Թևոնյանը մարզպետի տեղակալ Վլադիմիր Խաչատրյանի և մարզպետի աշխատակազմի ոլորտային պատասխանատուների ուղեկցությամբ այցելել է Մասիս համայնքի Հովտաշատի և Հայանիստի միջնակարգ դպրոցների կառուցման շինհրապարակներ։

 Կրթօջախները կառուցվում են ՀՀ կառավարության և Ասիական Զարգացման բանկի միջոցներով։

 Հովտաշատի դպրոցը նախատեսված է 576 աշակերտի համար, ծրագրի արժեքը կազմում է 1,9 միլիարդ դրամ։

 Հայանիստի դպրոցը նախատեսված է 432 աշակերտի համար, արժեքը՝ 2 միլիարդ 299 միլիոն դրամ է։

 Մարզպետ Թևոնյանը շրջել է դպրոցների տարածքներում, հետևել կատարվող աշխատանքների ընթացքին՝ նկատելով, որ շինարարությունն ընթանում է լայն թափով։ Մարզի ղեկավարը հորդորել է աշխատանքները կատարել բարձր որակով և ավարտին հասցնել սահմանված ժամկետներում, քանի որ վերոնշյալ ուսումնական հաստատությունների աշակերտներն այս պահին հաճախում են հարակից համայնքների դպրոցներ՝ կրելով անհարմարություններ։

 Նշենք, այս երկու դպրոցն էլ ունեցել են բարձր սեյսմիկ խոցելիության աստիճան և տնտեսապես արդյունավետ չէր դրանց վերակառուցումը, ուստի Կառավարությունը որոշել է դպրոցների հին շենքերի փոխարեն կառուցել նորերը։