ՀՀ-ում 25 ընկերություն ՊՆ-ից ռազմարդյունաբերության ոլորտում պատվեր է ստացել․ ԲՏԱ նախարար
Ռազմարդյունաբերության ոլորտում 25 կազմակերպություն ունի պատվեր պաշտպանության նախարարությունից, ակնկալվում է, որ տարվա արդյունքում այս թիվը կավելանա մինչև 29։ Պաշտոնավարման 100 օրերի ամփոփիչ մամուլի ասուլիսի ժամանակ հայտարարեց բարձր տեխնոլոգիական արդյունաբերության նախարար Մխիթար Հայրապետյանը։
«Այս պահին գործող եռամյա 46 պայմանագիր ունենք, և պաշտպանության նախարարությունն այս պահին արդեն 122 միլիարդ դրամի պատվեր է տվել հայաստանյան ընկերություններին։ Տարվա կտրվածքով ակնկալում ենք, որ պատվերների ընդհանուր գումարը կկազմի 191 միլիարդ դրամ»,- ասաց Հայրապետյանը։
Նախարարը բացատրեց՝ Ռազմարդյունաբերության կոմիտեն ունի, այսպես ասած, գործարաններ, ռազմարդյունաբերական գործունեություն ծավալող ընկերություններ, որոնցում կառավարությունը հանդես է գալիս որպես հիմնական բաժնետեր։ Կոմիտեի հիմնական առաքելությունն է ստեղծել այնպիսի միջավայր, որ այն գրավիչ լինի ոլորտային խաղացողների համար՝ թե գիտահետազոտական, թե բիզնես տեսանկյունից։
Ըստ նրա՝ ռազմարդյունաբերական կոմիտեն մշտապես փնտրում է նոր հնարավորություններ Հայաստանի Հանրապետություն նոր տեխնոլոգիական կարողություններ և գիտելիքներ ներմուծելու համար։
Աղբյուրը` arm.sputniknews.ru