Երևանում կանցկացվի բացօթյա արյունատվության ակցիա. որտե՞ղ կարող են գնալ դոնորները
Երևանի տարբեր վարչական շրջաններում հունիսի 14-ին բացօթյա արյունատվության ակցիա կիրականացվի։ Այս մասին մամուլի ասուլիսի ժամանակ հայտնեց Յոլյանի անվան արյունաբանական կենտրոնի Արյան բաղադրամասերի պաշարման բաժանմունքի վարիչ Արմեն Պետրոսյանը։
Նշենք, որ արդեն 20 տարի է, որ հունիսի 14-ն ամբողջ աշխարհում նշվում է որպես արյան դոնորների համաշխարհային օր։
«Մենք որոշել ենք արյան հավաքագրման միջոցառումներ կազմակերպել։ Դրանք կազմակերպվելու են Խաչքարների պուրակում, Դիանա Աբգարի անվան զբոսայգում (Սարյան–Մաշտոցի պողոտա), ինչպես նաև Արյան բանկում։ Սկսվելու է առավոտյան ժամը 09։30-ից, իսկ ավարտը կլինի 15։30-ին։ Մենք արդեն որոշ քանակի դոնորներ ունենք, ովքեր նախապես հայտնել են, որ պատրաստ են դառնալ դոնոր, բայց կարող են մոտենալ նաև բոլոր ցանկացողները։ Տեղում մենք սքրինինգ կանցկացնենք, այնտեղ կլինեն թերապևտը, բժիշկը», – ասաց Պետրոսյանը։
Նրա խոսքով` քաղաքացիների մոտ հաճախ վախեր են լինում, որոնք կապված են որոշ միֆերի հետ։ Օրինակ` հաճախ հարցնում են` արդյոք ստերիլ է ամեն ինչ, քանի որ վախենում են որևէ հիվանդությամբ վարակվելուց։ Որպես տարածված միֆ Պետրոսյանը նշեց նաև այն, որ շատերը հարցնում են՝ արդյոք 1 անգամ դոնոր դառնալով, հետագայում ամբողջ կյանքում իրենց ինքնազգացողությունը վատ կլինի, եթե այլևս արյուն չհանձնեն։
Դոնորից վերցվում է 400-450 մլ արյուն, ինչը նույնիսկ առողջարար է մարդու համար` սրտանոթային հիվանդությունների ռիսկն է նվազում, նյութափոխանակությունն է կարգավորվում, արյան շրջանառությունը նույնպես լավանում է։ Բժիշկը վստահեցրեց` արյան դոնորները միջինում 5-7 տարի ավելի երկար են ապրում, քան ոչ դոնորները, որովհետև նրանք սիստեմատիկ ստուգվում են ու կարող են խնդրի դեպքում կանխարգելել ցանկացած հիվանդություն։
Տարվա կտրվածքով կանայք կարող են 4 անգամ արյուն հանձնել, տղամարդիկ` 5 անգամ։ Լինում է 3 կատեգորիայի դոնոր` վճարովի, հիվանդի հարազատներ և անվարձահատույց։ Ներկա պահին ՀՀ–ում գերակշռում են վճարովի դոնորները, բայց տարբեր ծրագրերի շնորհիվ փորձում են երկրում զարգացնել անվարձահատույց դոնորության մեխանիզմը։
Դոնոր կարող են դառնալ 18 տարեկանը լրացած անձինք, ինչպես նաև առնվազն 52 կգ քաշով իգական սեռի ներկայացուցիչները և 62 կգ քաշով արական սեռի ներկայացուցիչները։ Դոնոր դառնալ ցանկացողների հեմոգլոբինի մակարդակի թույլատրելի սահմանները կանանց դեպքում պետք է լինեն 125-180 գրամ/լիտր, տղամարդկանց դեպքում` 135-188 գրամ/լիտր, իսկ արյան ճնշումը պետք է այդ պահին չլինի շատ բարձր կամ ցածր, երակազարկն էլ 60-90 զարկ 1 րոպեում։
Արյունատվության հակացուցումներին և ժամանակավոր հակացուցումներին, ինչպես նաև այլ մանրամասների կարող եք ծանոթանալ այստեղ։
Աղբյուրը` arm.sputniknews.am