Եվրահանձնաժողովը 12,9 մլն եվրոյի դրամաշնորհ կհատկացնի ՀՀ-ին՝ ուղղված ՀԱԷԿ-ի անվտանգությանը
Կառավարությունն իր այսօրվա՝ դեկտեմբերի 27-ի նիստում հավանություն տվեց «Հայաստանի և Եվրոպական հանձնաժողովի միջև «Հայաստանում միջուկային անվտանգության, ճառագայթային պաշտպանության և ռադիոակտիվ թափոնների կառավարման ենթակառուցվածքների ամրապնդում» ֆինանսավորման համաձայնագրին:
Այս համաձայնագրի (12.9 մլն եվրո տեխնիկական աջակցության դրամաշնորհ) նպատակն է աջակցել Հայաստանում միջուկային անվտանգության, ճառագայթային պաշտպանության և ռադիոակտիվ թափոնների կառավարման ենթակառուցվածքի ամրապնդմանը:
Համաձայնագրի շրջանակներում ՀՀ-ին կհատկացվի ֆինասնական աջակցություն՝ լուծելու հետևյալ հիմնախնդիրները.
- Ֆուկուսիմայի ԱԷԿ-ի վթարից հետո Հայկական ատոմային էլեկտրակայանում իրականացված անվտանգության ինքնագնահատման՝ ստրեսս-թեսթի արդյունքում մշակված միջոցառումների ազգային պլանում ներառված և դեռևս չիրականացված միջոցառումների ներդրում, մասնավորապես.ծանր վթարի ժամանակ առաջացող և հերմետիկ գոտում կուտակվող ջրածնի պայթյունավտանգության չեզոքացման համար պասսիվ ռեկոմբայներների մատակարարում և տեղադրում ՀԱԷԿ 2-րդ էներգաբլոկի հերմետիկ գոտում, հերմետիկ գոտու քփության բարձրացում։
Նշված միջոցառումները կբարձրացնեն ՀԱԷԿ անվտանգությունը։
- Աջակցության տրամադրում Միջուկային ոլորտը կարգավորող հայաստանյան մարմնին՝ ՀՀ միջուկային անվտանգության կարգավորման կոմիտեին, ՀԱԷԿ-ի անվտանգության պարբերական գնահատման հարցում։
Կոմիտեի կարողությունների բարձրացումը հնարավորություն կտա դիտարկել ՀԱԷԿ-ի կողմից ներկայացված Անվտանգության պարբերական հաշվետվությունը, գնահատելու ԱԷԿ-ի անվտանգության մակարդակի համապատասխանությունը անվտանգության գործող կանոնների և նորմերի պահանջներին, գնահատելու ՀԱԷԿ-ի սթրես-թեստիազգային պլանում և անվտանգության բարձրացման ծրագրում ներառված միջոցառումների իրականացումը, ինչպես նաև՝ դիտարկելու ՀԱԷԿ-ի շահագործումից հանելու և ռադիոակտիվ թափոնների և աշխատած միջուկային վառելիքի կառավարման պլանները։
- Աջակցություն Հայաստանում ռադիոքիմիական ռեֆերենսային լաբորատորիայի ստեղծմանը, որը կնպաստի ՀՀ-ում շրջակա միջավայրի ճառագայթային մոնիթորինգի ազգային ենթակառուցվածքի, ինչպես նաև վթարային հակազդման և ճառագայթման աղբյուրների ճառագայթային մոնիթորինգի համակարգերի բարելավմանը, շրջակա միջավայրի ճառագայթային մոնիթորինգի միջոցառումներիիրականացման համար ժամանակակից միջազգային փորձի և գիտելիքների ձեռքբերմանը։
Ռադիոակտիվ թափոնների կառավարման ոլորտում ռադիոակտիվ թափոնների պահման կոնտեյներների արտադրության անկախ ներուժի ձեւավորում։
Աղբյուրը՝ news.am