Ինչ է արվում Լոռիում և Տավուշում հեղեղումներից մոտ 8 ամիս անց․ պարզաբանում է նախարարը
ՏԿԵ նախարարի խոսքով՝ աղետի գոտում տուժածներին փոխհատուցումներ տրամադրելու համար պետբյուջեից ավելի քան 1 մլրդ դրամ է ուղղվել։
ՀՀ Լոռու և Տավուշի մարզերում հեղեղումներից մոտ 8 ամիս անց աղետի գոտում դեռևս աշխատանքներ են տարվում, մասնավորապես մաքրվում են գետերի հուները՝ հետագա մեծ խնդիրներից խուսափելու համար։ Այս մասին 2024 թվականն ամփոփող մամուլի ասուլիսի ժամանակ ասաց ՀՀ տարածքային կառավարման և ենթակառուցվածքների նախարար Դավիթ Խուդաթյանը։
Նշենք, որ 2024 թվականի մայիսի 26-ին տեղատարափ անձրևներից հետո Լոռիում և Տավուշում Դեբեդ, Աղստև և Տաշիր գետերը վարարել էին, ինչի հետևանքով 4 մարդ է մահացել։ Տուժած բնակավայրներն այդ ժամանակ հայտարարվեցին աղետի գոտի։
Խուդաթյանը նշեց, որ ներկայում հեղեղումներից տուժած բնակավայրերում չկան երթևեկության համար փակ ճանապարհներ, ուղղակի որոշ լուծումներ դեռ վերջնական չեն։
«Աղետը մեզ սովորեցրեց ճանապարհները նախագծելիս և հաշվարկելիս ավելի ուշադիր լինել։ Այս պահին գործընկերների հետ աշխատում ենք, որպեսզի հնարավոր աղետի դեպքում ճանապարհները պատշաճ հիմնանորոգված լինեն։ Այս պահին աղետի գոտում կամրջի տեղադրման աշխատանքներ են իրականացվում, Քարկոփը միակ բնակավայրն էր, որ չուներ կամուրջ, սակայն առաջիկայում կունենա»,- ասաց Խուդաթյանը։
ՏԿԵ նախարարը նաև ընդգծեց, որ աղետի գոտում տուժածներին փոխհատուցումներ տրամադրելու համար պետբյուջեից ավելի քան 1 մլրդ դրամ է ուղղվել։ Փոխհատուցումներ են տրվել այն ընտանիքներին, որտեղ մարդկային, գույքային կորուստներ են եղել։ Այն անձինք, որոնք այգիներ և կենդանիներ են կորցրել, նույնպես փոխհատուցում են ստացել, անմասն չեն մնացել նաև մեքենաները կորցրած անձինք։