Վերջին տարիներին Երևանում օդի աղտոտվածության մեծ փոփոխություն չի գրանցվել. Սիմիդյան
Ըստ տարեկան դիտարկումների՝ վերջին տարիներին Երևանում օդի աղտոտվածության մեծ փոփոխություն չի գրանցվել:
Այս մասին հունվարի 10-ին ասուլիսի ժամանակ ասաց ՀՀ շրջակա միջավայրի նախարար Հակոբ Սիմիդյանը:
«Վերջին տարիներին Երևանում օդի աղտոտվածության մեծ փոփոխություն, ըստ տարեկան դիտարկումների, չի գրանցվել: 2024 թվականի ամռան շրջանում, ըստ էության, դիտվել է փոշու կոնցենտրացիայի նվազում, 2024 թվականի նոյեմբեր-դեկտեմբեր ամիսների տվյալները շատ չեն տարբերվում 2022-23 թվականների տվյալներից»,- ասաց Սիմիդյանը:
Նա նշեց՝ Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ի կողմից մթնոլորտային օդի մասով դիտարկվում են մթնոլորտային օդում ծծմբի երկօքսիդի, ազոտի երկօքսիդի, գետնամերձ օզոնի և ըստ բաղադրության չտարբերակված փոշու պարունակությունները:
Ըստ նախարարի՝ սա այն կարողություն է, որ այս պահին նախարարությունն ունի: Իսկ դիտարկումներն իրականացնում են Երևան քաղաքում 5 անշարժ և 45 շարժական դիտակետերում՝ շաբաթական կտրվածքով: 5 անշարժ դիտակետերը վերը նշված բաղադրիչներն ուսումնասիրելու, իսկ շարժականները միայն ծծմբի և ազոտի երկօքսիդի տվյալներն ուսումնասիրելու նպատակով են:
«Մոնիթորինգի այն համակարգը, որը մենք ունենք այս պահին, նոր անհանգստացնող տվյալներ չի գրանցել, քան նախկինում կար: Մեր համոզմամբ՝ անհանգստությունները, որոնք այս պահին ունենք, ձևավորվել են Երևանի քաղաքապետարանի կողմից սենսորային սարքերի տեղադրման արդյունքում, որոնք տեղադրված են հիմնականում շինհրապարակներում: Ինչպես նաև որոշակի անհանգստացնող թվեր են ներկայացնում շվեյցարական կազմակերպության կայքի տվյալները: Նշեմ, որ միջազգային ստանդարտների համաձայն՝ դեռևս չկա հավաստում, որ այս սարքերի տվյալները ճշգրիտ են, դրանք կարող են մինչ 40 տոկոս շեղում գրանցել: Դրանք ավելի շատ օժանդակող սարքեր են այն արդիական համակարգի համար, որը մենք առաջիկայում ուզում ենք ձեռք բերել»,- նշեց Սիմիդյանը: