Apple-ի բաժնետոմսերը նվազել են

Apple-ի բաժնետոմսերը հունվարի 16-ի սակարկությունների ժամանակ նվազել են 4%-ով, ինչը վատագույն անկումն է 2024 թվականի օգոստոսի 5-ից ի վեր, հայտնում է CNBC-ն՝ վկայակոչելով առևտրի տվյալները։ Առևտրի ավարտին Apple-ի բաժնետոմսերն արժեն 228․26 դոլար (-4․04%):

Բաժնետոմսերի գնի անկման պատճառ է դարձել Canalys հետազոտական ​​ընկերության զեկույցը։ Այն պնդում է, որ Apple-ը Չինաստանում սմարթֆոնների վաճառքով զբաղեցրել է երրորդ տեղը՝ զիջելով Vivo-ին և Huawei-ին։ Ընդհանուր առմամբ, 2024 թվականին Չինաստանում վաճառվել է 284 միլիոն սմարթֆոն, որից 15%-ը iPhone-ներ են, մինչդեռ Vivo-ին և Huawei-ին բաժին է ընկել համապատասխանաբար 17%-ը և 16%-ը, նշում է Reuters-ը։ Ընդհանուր առմամբ Apple-ի վաճառքները մեկ տարվա ընթացքում նվազել են 17%-ով, նշում է CNBC-ն։

Canalys-ի վերլուծաբան Թոբի Չժուն Apple-ի արդյունքները Չինաստանում անվանել է տարվա վատագույններից: Ինչպես նշում է Reuters-ը, Չինաստանում iPhone-ի վաճառքի անկումը ամենամեծն էր 2016 թվականից ի վեր և շարունակվել է 2024 թվականի բոլոր չորս եռամսյակներում։

Apple-ի խնդիրները չինական շուկայում վկայում են այն մասին, որ նրա մրցունակությունը խաթարվում է այնպիսի գործոնների պատճառով, ինչպիսիք են երկրում վաճառվող iPhone-ի վերջին մոդելներում արհեստական ​​բանականության գործառույթների բացակայությունը, հայտնում է Reuters-ը: