Պարենային ապրանքների միջազգային հենանիշային գների նվազում հունվար ամսին

ՊԳԿ բուսական յուղերի գնային ինդեքսը նախորդ ամսվա համեմատ նվազել է 5.6 տոկոսով, այդպիսով հակադարձելով անցած ամիսների բարձրացումը, սակայն դեռեւս 24.9 տոկոսով բարձր է նախորդ տարվա նույն ամսվա մակարդակից։ 

Հունվար ամսին գնիջեցումը հիմնականում պայմանավորված էր արմավի եւ ռափսի յուղերի համաշխարհային գների նվազմամբ, թեեւ սոյայի եւ արեւածաղկի յուղերի գները կայուն են մնացել։ ՊԳԿ մսի գնային ինդեքսը, նույնպես, հունվարին նվազել է 1.7 տոկոսով, որտեղ ոչխարի, խոզի եւ թռչնամսի ցած մղված միջազգային գները փոխհատուցվել են տավարի մսի գնանշումների բարձրացմամբ։

Մինչ այդ, ՊԳԿ հացահատիկային ապրանքների գնային ինդեքսը դեկտեմբեր ամսվա համեմատ 0.3 տոկոս աճ է արձանագրել, որը, սակայն, 6.9 տոկոսով ցածր է 2024 թվականի հունվարի ցուցանիշից։ Փոքր-ինչ նվազել են հացահատիկի արտահանման գները, որը մասամբ բացատրվում է արտադրության ցածր ցուցանիշով եւ Ամերիկայի Միացյալ Նահանգներում պաշարների կանխատեսումներով։  ՊԳԿ բոլոր տեսակների բրնձի գնային ինդեքսը մեծածավալ արտահանումների պայմաններում հունվար ամսին 4.7 տոկոսի անկում է արձանագրել։

ՊԳԿ կաթնամթերքի գնային ինդեքսը դեկտեմբերից ի վեր 2.4 տոկոսով վեր է ելել, որը 20.4 տոկոսով բարձր է 2024 թվականի հունվարի մակարդակից։ Այս վերելքի հիմքում պանրի միջազգային գնանշումների 7.6 տոկոս աճն է, որը փոխհատուցվում է կարագի եւ կաթի փոշու գների անկմամբ։

ՊԳԿ-ն ուրբաթ օրը հրապարակել է նաեւ Հացահատիկային մշակաբույսերի առաջարկի եւ պահանջարկի ամփոփագրի նոր թողարկումը, որտեղ ներկայացված են հացահատիկային մշակաբույսերին առնչվող նոր միտումները 2025 թվականի համար։

Հյուսիսային կիսագնդում աշնանացան ցորենի ցանքի սեզոնն ավարտվեց հունվարին եւ արդեն բոլոր նշանները վկայում էին ցանքի՝ Ֆրանսիայում, Գերմանիայում եւ Միացյալ Թագավորությունում ցուցանիշների ավելացման եւ Ռուսաստանի Դաշնությունում՝ կրճատման մասին, որոնք պայմանավորված են եղանակային պայմանների ազդեցությամբ: