Դ․ Ազատյան․ Սպառողական վարկերի տրամադրումը կարող է սահմանափակվել

Բանկերը կարող են սահմանափակել, զսպել սպառողական վարկերի տրամադրումը, եթե Հայաստանի կենտրոնական բանկն առաջիկայում խստացնի վարկավորման նկատմամբ վերահսկողությունը, ինչի մասին մտադրությունը արտացոլված է փետրվարի 13-ին հրապարակված «ՀՀ կենտրոնական բանկի կողմից ՀՀ բանկերի նկատմամբ 2025-2027 թվականներին իրականացվող պրուդենցիալ վերահսկողության առաջնահերթություններ» փաստաթղթում։

Հայաստանի բանկերի միության նախագահ Դանիել Ազատյանի կարծիքով, ԿԲ որոշումը պայմանավորված է ՀՀ բանկային համակարգի ընդհանուր վարկային պորտֆելի կենտրոնացվածությամբ․ 2024թ–ին բանկերի կողմից տրամադրված վարկերի 45 տոկոսը կազմել են հատկապես հիփոթեքային և սպառողական վարկերը։

«Եթե ընդունենք, որ հատկապես հիփոթեքային վարկավորման աճը պայմանավորված է եղել եկամտահարկի վերադարձի սահմանափակման հետ, կարող ենք ենթադրել, որ 2025-ին մենք հիփոթեքային վարկերի աճ չենք ունենա։ Իսկ ինչ վերաբերում է սպառողական վարկերին, դա, իմ կարծիքով ԿԲ–ին ավելի տեսանելի է։ Կարծում եմ` բանկերը հարգանքով կմոտենան այդ որոշմանը, և հնարավոր է`ռիսկերի զսպման կոնտեքստում զսպեն նաև սպառողական վարկերի տրամադրումը»,– ասաց Դանիել Ազատյանը՝ հավելելով, որ Հայաստանում բանկերի կապիտալացման աստիճանը բարձր է, բանկերը կարող են զսպել ռիսկերը՝ շարունակելով վարկավորումը։