Հայաստանի անշարժ գույքի շուկայի վերլուծություն. Գրանթ Թորնթոն
Գրանթ Թորնթոն Հայաստանը հրապարակել է ՀՀ-ում անշարժ գույքի շուկայի վերլուծություն, որի համաձայն 2024 թ.արձանագրվել է զգալի աճ.իրականացվել է 247,916 գործարք, ինչը 12.88%-ով գերազանցում է 2023-ի ցուցանիշը։
Երեւանում է կատարվել գործարքների մոտ 28%-ը, ամենաակտիվ մարզերն են Կոտայքը, Արարատը եւ Արմավիրը։ Չնայած ընդհանուր աճին, օտարերկրյա քաղաքացիների կողմից իրականացված անշարժ գույքի գործարքների թիվը նվազել է, ինչը հնարավոր է պայմանավորված է տնտեսական եւ քաղաքական գործոններով։
2024 թվականին առաջնային գրանցման գործարքներն աճել են 30.44%-ով, իսկ գրավադրման եւ օտարման գործարքները՝ համապատասխանաբար 18.77% եւ 9.34%-ով։ Միեւնույն ժամանակ, օրինականացման գործարքների թիվը փոքր-ինչ նվազել է՝ 1.28%-ով։
Անշարժ գույքի առուվաճառքի ակտիվությունը հատկապես բարձր է եղել Երեւանում, որտեղ կոմերցիոն եւ բնակելի անշարժ գույքի նկատմամբ հետաքրքրությունը շարունակել է աճել՝ պայմանավորված ինչպես ներդրումային ակտիվությամբ, այնպես էլ քաղաքաշինական ծրագրերով։
Ինչ վերաբերում է գներին, ապա բազմաբնակարան շենքերի բնակարանների վաճառքի գործարքները 2024 թվականին աճել են 24.64%-ով՝ պայմանավորված եկամտահարկի վերադարձման ծրագրի ավարտով, ինչը մեծացրել է բնակարանների նկատմամբ պահանջարկը։
Գների փոփոխությունների առումով 2024 թվականին Երեւանի եւ մարզկենտրոնների բնակարանների 1 քմ-ի միջին արժեքը շարունակել է աճել՝ թեեւ ավելի դանդաղ տեմպերով։ Մեծամորում, Սեւանում եւ Ջերմուկում գների աճը գերազանցել է 20%-ը, ինչը պայմանավորված է զբոսաշրջային եւ ներդրումային ակտիվության աճով։
Ըստ վերլուծության, 2024 թվականի անշարժ գույքի շուկայի ակտիվությունը մեծապես պայմանավորված էր կարճաժամկետ խթաններով, ինչպիսիք են հարկային արտոնությունների ավարտը։
Ամբողջական վերլուծությունը հասանելի է այս հղումով: