«Ժողովուրդ». 2024 թ․-ին արձանագրվել է վերջին տարիների ամենացածր տնտեսական ակտիվության ցուցանիշը 2020-ից հետո

Ժողովուրդ օրաթերթը գրում է. «2024 թվականի հունվար-դեկտեմբեր ամիսներին Հայաստանի տնտեսական ակտիվության ցուցանիշը նախորդ տարվա նույն ժամանակահատվածի համեմատ աճել է 8 տոկոսով։ Այս մասին «Ֆեյսբուք»-ի էջում հայտնել էր ՀՀ ֆինանսների նախարարությունը դեռ հունվար ամսվա վերջին։ «Տնտեսական աճի հիմնական շարժիչները եղել են հետեւյալ ոլորտները. արդյունաբերություն՝ 4.7 տոկոս, գյուղատնտեսություն՝ 1.6 տոկոս, շինարարություն՝ 14.5 տոկոս, առեւտուր՝ 17.0 տոկոս, ծառայություններ՝ 10.6 տոկոս», – ասված էր հայտարարությունում։

Ըստ Վիճակագրական կոմիտեի հրապարակած տվյալների՝ տնտեսության առանձին ճյուղերում արձանագրվել են կասկածելի աճեր, սակայն արդյունաբերության ոլորտում կտրուկ անկում է նկատվում։

Այսպես, շինարարության ոլորտում գրանցվել է 11,6% աճ, ներքին առեւտրի շրջանառությունն ավելացել է 11,5%-ով, իսկ ծառայությունների ոլորտում աճը կազմել է 10,4%։ Արդյունաբերության ոլորտում գրանցվել է զգալի՝ 19 % անկում։ Հարկ է նշել, որ Հայաստանում վերջին 5 տարիների ընթացքում նման խայտառակ վիճակագրություն նկատվել է միայն 2020-2021 թվականներին։

2019 թվականին տնտեսական ակտիվության ցուցանիշը աճել է 7.8%-ով։
2020 թվականին ՏԱՑ-ը նվազել է 7.5%-ով, ինչը պայմանավորված էր COVID-19 համավարակով եւ Արցախյան երկրորդ պատերազմով։
2021 թվականին ՏԱՑ-ն աճել է 5.8%-ով՝ վերականգնվելով նախորդ տարվա անկումից հետո։
2022 թվականին ՏԱՑ-ն աճել է 14.2%-ով՝ դառնալով վերջին տարիների ամենաբարձր ցուցանիշներից մեկը։
2023 թվականին ՏԱՑ-ն աճել է 9.8%-ով՝ պահպանելով բարձր աճի տեմպերը։
2024 թվականին ՏԱՑ-ն աճել է 8%-ով»:

Առավել մանրամասն թերթի այսօրվա համարում