ՀՀ էկոնոմիկայի նախարարն այցելել է «Էդմետ» ընկերություն՝ գործունեությանն ու առաջիկա ծրագրերին ծանոթանալու նպատակով
ՀՀ էկոնոմիկայի նախարար Գևորգ Պապոյանն ապրիլի 3-ին այցելել է «Էդմետ» ՍՊԸ՝ ընկերության գործունեությանն ու առաջիկա ծրագրերին ծանոթանալու նպատակով։ Այցին մասնակցել է նաև նախարարի տեղակալ Էդգար Զաքարյանը։
«Էդմետ» ՍՊԸ-ն հիմնադրվել է 2015 թ.-ին: Ընկերությունը Հայաստանի ողջ տարածքում ունի հավաքագրման կետեր և զբաղվում է մետաղական ջարդոնների հավաքագրմամբ։ Այն ունի սեփական ձուլարան, որտեղ և իրականացվում է հավաքագրված մետաղների ձուլումը:
Ընկերությունն ունի 60 աշխատակից, տարեկան շրջանառությունը կազմում է 12 միլիարդ ՀՀ դրամ, տարեկան արտադրողականությունը՝ 10 հազար տոննա, որի մեծ մասը արտահանվում է։ Արտահանման հիմնական ուղղությունը Ճապոնիան է, մասնավորապես՝ համագործակցում են ճապոնական «Տոյոտա» և «Հոնդա» ընկերությունների հետ։ Ընկերության արտադրանքը մասամբ արտահանվում է նաև եվրոպական մի շարք երկրներ, Չինաստան և Հարավային Կորեա։
Կատարված ներդրումների չափն արդեն իսկ հասնում է 8 մլն ԱՄՆ դոլարի, ևս 3-4 մլն դոլարի ներդրում նախատեսվում է առաջիկայում իրականացնել գործարանի վերազինման և արտադրողականաւթյան ծավալների մեծացման նպատակով։
Գործարանի տարածքում գործում է լաբորատորիա, որը արտադրանքի՝ ստանդարտներին համապատասխանության գնահատականն է տալիս, ինչի հիման վրա հնարավոր է դառնում կազմակերպել արտահանման գործընթացը։
Գործարանը զինված է նորագույն ֆիլտրացիոն համակարգով (թևքային ֆիլտրեր), որի շնորհիվ արտանետումները մթնոլորտ հասցված են նվազագույնի։
Շրջայցի ընթացքում նախարարը ներկայացրել է պետական օժանդակության գործիքակազմը, որից կարող է օգտվել ընկերությունը իր գործունեությունն արդիականացնելու նպատակով։