Պղնձի գներն աճում են ԱՄՆ-ի և Չինաստանի միջև բանակցություններից հետո

Երկուշաբթի օրը պղնձի գներն աճել են ԱՄՆ-ի և Չինաստանի միջև առևտրային քաղաքականության վերաբերյալ բանակցություններից հետո, ինչպես վկայում են առևտրի տվյալները։ Մոսկվայի ժամանակով 09:11-ին՝ Comex բորսայում հուլիսյան ֆյուչերսային գինը պղնձի համար աճել է 1,07%-ով՝ հասնելով մեկ ֆունտի (մոտ 0,45 կգ) դիմաց 4,703 դոլարի։

Լոնդոնի մետաղների բորսայում (LME) ուրբաթ օրվա առևտրի արդյունքներով պղնձի մեկ տոննայի գինը (մատակարարմամբ երեք ամիս հետո) աճել է 0,15%-ով՝ հասնելով 9 445,5 դոլարի, ալյումինի գինը՝ 0,21%-ով՝ մինչև 2 417,5 դոլար, իսկ ցինկինը՝ 1,32%-ով՝ մինչև 2 653,5 դոլար։

Մայիսի 10-11-ը Չինաստանն ու ԱՄՆ-ն Ժնևում բարձր մակարդակով բանակցություններ են վարել առևտրատնտեսական հարցերի շուրջ։ Չինաստանի կողմից բանակցություններին մասնակցել է Պետխորհրդի փոխվարչապետ Հե Լիֆեն, իսկ ԱՄՆ-ից՝ ֆինանսների նախարար Սքոթ Բեսենթը։ Բանակցությունների վերաբերյալ համատեղ հայտարարությունը կհրապարակվի երկուշաբթի օրը։

Հե Լիֆեն հայտարարել է, որ Ժնևում կայացած բանակցությունները հիմք են հանդիսացել երկու երկրների միջև առևտրային տարաձայնությունների հետագա լուծման համար։

Չինաստանը հանդիսանում է պղնձի շուկայի խոշորագույն սպառողն ու ներմուծողը, ուստի ներդրողները ուշադիր հետևում են այդ երկրի վերաբերյալ մակրոտնտեսական նորություններին։