Հարկադիր կատարման գործընթացում ծանուցման խնդիրներ կան, անցում կկատարվի էլեկտրոնային ձևաչափի․ Սիրո Ամիրխանյան
Հարկադիր կատարման գործընթացում ծանուցումների հետ կապված խնդրի լուծման ուղղությամբ իրականացվում են կառուցվածքային բարեփոխումներ։ Նախատեսվում է անցում կատարել էլեկտրոնային ծանուցման համակարգի, և այս պահին ընթանում են համապատասխան իրավական կարգավորումների մշակման աշխատանքներ։
«Արմենպրես»-ի հետ հարցազրույցում այս մասին ասաց գլխավոր հարկադիր կատարող Սիրո Ամիրխանյանը։
Հարցազրույցի ընթացքում նա խոսեց թվայնացման և նոր գործիքների կիրառման, «Կատարողական վարույթի մասին» նոր օրենքի կարգավորումների, անհուսալի վարկառուներին աջակցության, շարժական գրասենյակների գործունեության, կադրերի վերապատրաստման, տեխնիկական վերազինման և առաջիկա տարիների տեսլականի մասին։
- Պարոն Ամիրխանյան, անցել է ավելի քան 100 օր Ձեր նշանակումից։ Ի՞նչ առաջնահերթ ուղղություններով եք սկսել աշխատանքը, և ի՞նչ փոփոխություններ են արդեն իսկ տեսանելի համակարգում։
- Ինչպես նշեցիք, իմ պաշտոնավարումից անցել է ավելի քան 100 օր, և պետք է նշեմ, որ այդ ժամանակահատվածը հնարավորինս արդյունավետ է օգտագործվել՝ ծառայության կողմից արդեն սկիզբ դրված բարեփոխումները շարունակելու և առավել ամրապնդելու համար։ Կարող եմ աշխատանքային ուղղությունները բաժանել չորս մասի։
Առաջին ուղղությամբ իրականացրել ենք իրավական դաշտի բարեփոխումներ։ Նախատեսվում է, որ 2026 թվականի հունվարի 1-ից ուժի մեջ կմտնի «Կատարողական վարույթի մասին» նոր օրենքը, և մեր աշխատանքը հիմնականում ուղղված է եղել այդ օրենքի կիրառման ապահովմանը, ինչպես նաև դրա շրջանակում ենթաօրենսդրական նորմատիվ իրավական ակտերի մշակմանը։
Երկրորդ ուղղությունը թվայնացումն է։ Այս կապակցությամբ պետք է նշեմ, որ Ծառայությունում գործառնությունները թվայնացված են, սակայն թվայնացումը ենթադրում է շարունակական գործընթաց, և մեր աշխատանքը միտված է եղել այդ ուղղության արդիականացմանը։
Երրորդ ուղղությամբ իրականացրել ենք կադրային և կառուցվածքային բարեփոխումներ։ Իմ կողմից արդեն իսկ նշանակվել են նոր կադրեր, որոնց առջև դրվել է պահանջ՝ ապահովել Ծառայության գործունեության նոր որակ։ Իրականացրել ենք նաև կառուցվածքային փոփոխություններ։ Եվ չորրորդ ուղղությունը միջազգային համագործակցության խորացումն է։ Մեզ համար առաջնահերթություն է համարվել գործընկերային կապերի ընդլայնումը։ Արդեն ունենք ձևավորված առավել սերտ հարաբերություններ Ռուսաստանի Դաշնության դատական կարգադրիչների ծառայության և նրա ղեկավարության, այլ պետությունների գործընկեր կառույցների, ինչպես նաև ակտիվ համագործակցում ենք Դատական կարգադրիչների միջազգային միության հետ։
- Ձեր ղեկավարությամբ ի՞նչ նոր մոտեցումներ կամ մեխանիզմներ են ներդրվել, որոնցով դուք ցանկանում եք բարեփոխել հարկադիր կատարման գործընթացը։
- Կառավարության դատաիրավական համակարգի բարեփոխումների ռազմավարությունը մեր առաջնային ուղղություններից մեկն է, և այդ շրջանակում ձեռնարկվող քայլերն ուղղված են ծառայության գործառնությունների արդյունավետության բարձրացմանն ու բոլոր քաղաքացիների համար արդարադատության հասանելիության ապահովմանը։
Առաջնային ուղղությունը, ինչպես արդեն նշել եմ, թվայնացումն է։ Թեև ներկայում ծառայության համակարգը հիմնականում թվայնացված է, այնուամենայնիվ, թվայնացումը պահանջում է պարբերական բարելավումներ։ Մեր ջանքերն ու միջոցներն ուղղված են այդ գործընթացի կատարելագործմանը՝ ապահովելու, որ ծառայության կողմից մատուցվող բոլոր գործողությունները հնարավորինս հասանելի և արդյունավետ լինեն քաղաքացիների համար։
Հաջորդ կարևոր ուղղությունը վերապատրաստումներն են։ Արդեն շուրջ 100 հարկադիր կատարող վերապատրաստվել է ինչպես Արդարադատության նախարարության կողմից կազմակերպված դասընթացների շրջանակում, այնպես էլ Եվրոպայի խորհրդի հայաստանյան գրասենյակի նախաձեռնությամբ իրականացված ծրագրերի շրջանակում։ Բացի այդ՝ մեզ համար կարևոր է միջգերատեսչական համագործակցությունը։ Նման հաջողված փորձ արդեն իսկ ունենք ՆԳՆ Փրկարար ծառայության հետ, և մեր աշխատակիցները մասնակցել են նաև այնտեղ կազմակերպված վերապատրաստումներին։ Այս ուղղությամբ մեր աշխատանքները շարունակական են։
Դատաիրավական բարեփոխումների շրջանակում ծառայությունում ներդրվել է նաև շարժական գրասենյակների ինստիտուտը։ Այժմ դրանք հաջողությամբ գործում են Սյունիքի, Գեղարքունիքի և Տավուշի մարզերում։ Այս նախաձեռնությունը ցույց է տվել իր արդյունավետությունը, և նախատեսում ենք շարունակել այդ ուղղությամբ աշխատանքը։
Ամբողջությամբ՝ armenpress.am