ՀՀ–ում ՎԶԵԲ–ի ներդրումները 2024թ․–ին հասել են ռեկորդային 400մլն եվրոյի․ ֆիննախ

2024 թվականին Հայաստանին ուղղված ՎԶԵԲ ներդրումները հասել են ռեկորդային 400 մլն եվրո սահմանաչափի, հայտարարել է ՀՀ ֆինանսների նախարար Վահե Հովհաննիսյանը Վերակառուցման և զարգացման եվրոպական բանկի (ՎԶԵԲ) նախագահ Օդիլ Ռենո-Բասոյի հետ հանդիպման ժամանակ։

Ինչպես հայտնում է Ֆինանսների նախարարության մամուլի ծառայությունը, անդրադառնալով ՎԶԵԲ կապիտալի մեծացման գործընթացին Հայաստանի մասնակցության թեմային, Վահե Հովհաննիսյանն ընգծել է Հայաստանի՝ կառույցի առաքելությանը սատարելու պատրաստակամության մասին:

Լոնդոն կատարած աշխատանքային այցի շրջանակում նախարարի գլխավորած պատվիրակությունը հանդիպումներ է ունեցել նաև ՎԶԵԲ առանձին մասնագիտական թիմերի հետ և քննարկել ՀՀ պորտֆելում առկա կարևոր ենթակառուցվածքային ծրագրերի առաջընթացը, ինչպես նաև առկա խնդիրները:

ՀՀ ֆինանսների նախարար Վահե Հովհաննիսյանի գլխավորած պատվիրակության կազմում են Երևանի քաղաքապետ Տիգրան Ավինյանը և ՀՀ տարածքային կառավարման և ենթակառուցվածքների նախարար Դավիթ Խուդաթյանը։

ՎԶԵԲ–ի մասին
Վերակառուցման և զարգացման եվրոպական բանկը Հայաստանի առաջատար ինստիտուցիոնալ ներդրողներից է։ ՀՀ–ում բանկի հիմնական առաջնահերթությունների թվում են ընկերությունների մրցունակության բարձրացումն ու ռիսկերի բաշխման պրոդուկտների միջոցով ֆինանսական հատվածի միջնորդությանն աջակցելը։