Sputnik. Առատ անձրևներն իրենց արդյունքն ունեցել են. Սևանա լճից օրենքով սահմանվածից քիչ ջրառ կարվի
Կառավարության որոշման նախագծով՝ այս տարի Սևանա լճից օրենքով սահմանված 170 միլիոն խորանարդ մետրից քիչ ջրառ կարվի։ Sputnik Արմենիայի հետ զրույցում ՀՀ շրջակա միջավայրի նախարարության ջրային ռեսուրսների կառավարման վարչության պետ Գայանե Հովսեփյանը նշեց՝ նախորդ տարի ևս սահմանվածից քիչ ջրառ էր արվել, բայց սա առաջին անգամն է, որ ջրառի քիչ ջրաքանակը կառավարության որոշմամբ է հաստատվում։
«38,2 մլն խորանարդ մետրով ավելի քիչ ջրառ է սահմանվել այս տարի՝ հաշվի առնելով ջրաքանակը Հրազդան գետում և ջրամբարների լցվածությունը»,- նշեց մասնագետը։
Նրա խոսքով՝ այս տարվա առատ անձրևներն իրենց արդյունքն ունեցել են, ուստի հաշվարկներ են արվել՝ հաշվի առնելով կանխատեսումներն ու առկա իրավիճակը, և որոշում է ընդունվել, որ այս պահի դրությամբ ջրառի նշված քանակը բավարար է։
Հիշեցնենք՝ կառավարության այսօրվա որոշման նախագծով նախատեսվել է լճից ոռոգման նպատակով մինչև 131.8 մլն մ3 ծավալով բացթողում` ներառյալ ջրօգտագործման թույլտվությամբ սահմանված «Գեղարքունիք» ջրօգտագործողների ընկերության 4.3 մլն մ3 ծավալով ջրառը:
Օրենքով սահմանված է Սևանից 170 մլն մ3 ջրառ։ Նշենք, որ 2024 թվականին Սևանա լճից ջրառի ծավալը չի գերազանցել օրենքով նախատեսված 170 մլն մ3–ը։
Աղբյուրը՝ arm.sputniknews.ru