DeepL-ը և Nvidia-ն խոստանում են թարգմանել ամբողջ ինտերնետն ընդամենը 18 օրում
Գերմանական DeepL ստարտափը, որը տրամադրում է առաջատար թարգմանչական ծառայություն, ներդրել է Nvidia-ի նորագույն արհեստական բանականության համակարգը, որն, ըստ ընկերության հետազոտման և մշակման բաժնի ղեկավար Ստեֆան Մեսկենի՝ թույլ կտա թարգմանել ամբողջ ինտերնետն ընդամենը 18 օրվա ընթացքում։
Նախկինում այս գործընթացը կգերազանցեր 194 օրը:
DeepL-ը սկսել է կիրառել Nvidia-ի DGX SuperPOD համակարգը, որը հիմնված է նորագույն Blackwell չիպերի վրա։ Ստարտափը, որն օգտագործում է սեփական AI մոդելները, համարվում է Google Translate-ի մրցակիցը։
Նոր ենթակառուցվածքը կօգնի DeepL-ին զարգացնել նորարարական պրոդուկտներ, ինչպիսին Clarify-ն է: Սա գործիք է, որը թույլ է տալիս թարգմանչական համակարգին խոսել օգտատիրոջ հետ, պարզելու համար, թե ինչ համատեքստում է օգտագործվում բառը։
Nvidia-ն հունիսի 11-ին Փարիզում կայացած GTC կոնֆերանսի ընթացքում հայտարարել է մի շարք համագործակցությունների մասին եվրոպական ընկերությունների հետ։ Ընկերության ղեկավար Ջենսեն Հուանը նշել է, որ Եվրոպայում արհեստական բանականության համար նախատեսված հաշվարկային հզորություններն առաջիկա երկու տարում կմեծանան 10 անգամ։
Nvidia-ի նոր նախագծերը ներառում են համագործակցություն ֆրանսիական Mistral ստարտափի հետ, որը ստեղծում է «AI ամպ»՝ օգտագործելով 18,000 նորագույն չիպ, ինչպես նաև AI ենթակառուցվածքային նախագծեր Գերմանիայում, Իտալիայում և Հայաստանում։