Մենք չենք կարող անտարբեր մնալ, երբ Մերձավոր Արևելքում իրավիճակը գլորվում է անդունդը. Չինաստանի արտգործնախարար

Չինաստանի արտաքին գործերի նախարար Վան Ին հայտարարել է, որ Իսրայելի գործողությունները խախտել են միջազգային իրավունքը և միջազգային հարաբերությունները կարգավորող նորմերը, ոտնձգություն են Իրանի ինքնիշխանությանն ու անվտանգությանը, ինչպես նաև խաթարել են տարածաշրջանային խաղաղությունն ու կայունությունը։ Հայտնում է Չինաստանի ԱԳՆ մամուլի ծառայությունը։

«Հակամարտությունն ընդհատել է Իրանի միջուկային հարցի շուրջ անուղղակի բանակցությունների դժվարին գործընթացը և խաթարել Օմանի միջնորդական ջանքերը։ Չինաստանը միշտ կողմ է եղել բոլոր վեճերի խաղաղ կարգավորմանը և դեմ՝ ուժի սպառնալիքին կամ կիրառմանը։ Մենք անմիջապես արտահայտեցինք մեր անհամաձայնությունը Իսրայելի կողմից ուժի կիրառմանը։

Առաջնահերթությունը հրադադարն է և ռազմական գործողությունների դադարեցումը։

Մենք չենք կարող նստել և դիտել, թե ինչպես է տարածաշրջանային իրավիճակը գլորվում անդունդը։ Այս կարևոր պահին միջազգային հանրությունը, մասնավորապես տարածաշրջանային երկրները, պետք է ավելի միավորեն իրենց ուժերը, պաշտպանեն արդարությունը և ստեղծեն միջազգային խթան՝ պատերազմին դեմ լինելու, խաղաղություն պաշտպանելու և քաղաքական լուծումներ պարտադրելու համար։

Չինաստանը կշարունակի պահպանել կապը և համակարգումը Օմանի և տարածաշրջանային այլ երկրների հետ և կառուցողական դեր կխաղա պատերազմի ավարտին և Մերձավոր Արևելքում խաղաղության վերականգնմանը նպաստելու գործում»,- ընդգծել է նախարարը։