Հինգուկես տարում 4.8 մլրդ դրամ՝ վարորդական վկայականի գործընթացի համար
երջին հինգուկես տարում քաղաքացիներն ավելի քան 4.8 մլրդ դրամ են վճարել ՀՀ պետական բյուջե՝ վարորդական վկայական ստանալու քննությունների և վարորդական վկայական ստանալու համար: Այս մասին NEWS.am-ը տեղեկացավ՝ ամփոփելով գրավոր հարցմանն ի պատասխան Ներքին գործերի նախարարությունից ստացված տվյալները:
Նշենք, որ միայն այս տարվա հինգ ամիսների ընթացքում վարորդական վկայականի տեսական քննություն է հանձնել 33109, իսկ գործնական՝ 27699 անձ: Նույն ժամանակահատվածում վարորդական վկայական է ստացել 11688 անձ, որից 2493-ը կամ 21.3 տոկոսը առաջին փորձից:
2024 թվականին վարորդական վկայականի տեսական քննություն է հանձնել 49553, իսկ գործնական՝ 39321 քաղաքացի: Նախորդ տարի վարորդական վկայական է ստացել 22547 անձ, որից 5536-ըը կամ 24.5 տոկոսը՝ առաջին փորձից:
Նշենք, որ գործող կարգավորումների համաձայն՝ վարորդական իրավունք ստանալու համար անհրաժեշտ է հանձնել տեսական և գործնական քննություն:
Տեսական և գործնական քննությունները կարելի է հանձնել բազմաթիվ անգամներ, յուրաքանչյուր անգամ վճարելով սահմանված վճարները: Տեսական քննության դրական արդյունքը պահպանվում է 1 տարի, որի ընթացքում կարելի է գործնական քննություն հանձնել: Գործնական քննությունը բացասական ստանալու դեպքում անհրաժեշտություն չկա տեսական քննությունը նորից հանձնելու:
Տեսականի համար անհրաժեշտ է վճարել 3.000 ՀՀ դրամ, գործնականի համար՝ 13.000 ՀՀ դրամ։ Վարորդական իրավունքի վկայականի համար սահմանված է վճար՝ 12.000 ՀՀ դրամի չափով:
Իսկ 2025 թվականի սեպտեմբերի 1-ից քաղաքացիները հնարավորություն կունենան հավելյալ վճարի դիմաց վարորդական վկայական ստանալու համար քննությունը վերահանձնել նաև բացասական գնահատական ստանալու հաջորդ օրը։ ՆԳ նախարար Արփինե Սարգսյանի ներկայացրած օրենսդրական նախագծերի համապատասխան փաթեթը հավանության է արժանացել ՀՀ կառավարության մայիսի 15-ի նիստում:
Նյութն ամբողջությամբ՝ news.am