Բաղրամյան համայնքում ուսումնասիրվել են նախօրեին տեղացած ուժգին կարկուտի պատճառած վնասները
Արմավիրի մարզպետի տեղակալ Բարսեղ Նիկողոսյանը, Բաղրամյան համայնքի ղեկավար Շանթ Առաքելյանի, մարզպետի աշխատակազմի և համայնքապետարանի, ոլորտային պատասխանատուների, վարչական ղեկավարների ուղեկցությամբ այսօր աշխատանքային այց է կատարել Բաղրամյան համայնք՝ տեղում ուսումնասիրելու Լեռնագոգ, Արգինա, Քարակերտ, Շենիկ և Դալարիկ բնակավայրերում նախօրեին տեղացած ուժգին կարկուտի հետևանքով պատճառված վնասները։
Այցի ընթացքում փոխմարզպետը դիտարկել է կարկուտից վնասված գյուղատնտեսական տարածքները, զրուցել համայնքների բնակիչների և գյուղացիական տնտեսությունների ներկայացուցիչների հետ։ Բնական աղետի հետևանքով զգալի վնաս է հասցվել ծիրանի, խաղողի, բոստանային և այլ մշակաբույսերի այգիներին ու ցանքատարածություններին։
Հանձնարարվել է համայնքային և մարզային պատկան ստորաբաժանումներին՝ անհապաղ իրականացնել վնասների նախնական գնահատում և կազմել համապատասխան փաստաթղթեր՝ հետագա ընթացակարգերի կազմակերպման նպատակով։
Արմավիրի մարզպետի աշխատակազմը շարունակելու է համագործակցությունը տուժած համայնքների ղեկավարության և բնակիչների հետ՝ հնարավորության սահմաններում ապահովելու պետական աջակցություն և օժանդակություն։