Բանակցել են, համաձայնության չեն եկել. «Թել-Սել» ԲԲԸ-ից ejc.am–ին պարզաբանում են
Փետրվարի 1–ից EasyPay-ը, Telcell-ը, Idram-ը և Fast Shift–ը չեն ընդունում բջջային երեք օպերատորների բաժանորդների վճարումները։ Բջջային օպերատորները առաջարկում են վճարումներ անել իրենց հավելվածներով, առևտրային բանկերի մասնաճյուղերում կամ «ՀայՓոստ»-ի բաժանմունքներում։ Վճարահաշվարկային կազմակերպությունները հայտարարել են, որ բջջային օպերատորների առաջարկած նոր պայմանները փոխշահավետ չեն, և վտանգում են ծառայությունների մատուցման տնտեսական հիմքերը։ «Թել-Սել» ԲԲԸ-ից ejc.am–ին պարզաբանում են, որ ընկերությունը որևէ նոր սակագին չի սահմանել և չի բարձրացրել գործող սակագները։ Նույն սակագները գործել են վերջին մի քանի տարիների ընթացքում։ Երեք բջջային օպերատորների համար կիրառվել են տարբեր սակագներ, ինչը պայմանավորված է հավաքագրվող գումարների ծավալների, գործարքների քանակի և միջին վճարման չափի տարբերություններով։
Հայաստանում գործող բջջային օպերատորները նույնաբովանդակ հայտարություններով՝ հաճախորդներին օրերս տեղեկացրին նոր փոփոխության մասին։ «Վերը նշված ընկերությունների հետ, ցավոք, հնարավոր չեղավ համաձայնության հասնել՝ փոխշահավետ պայմաններով գործակցության շուրջ: Փոխշահավետ պայմաններով գործակցությունը հնարավոր է դարձել ՀՀ բանկերի ու «ՀայՓոստ» ՓԲԸ–ի հետ»։
Սակագների նվազեցման պահանջը ներկայացվել է հենց կապի օպերատորների կողմից՝ պարզաբանում են «Թել-Սել» ԲԲԸ-ից։ Նշում են, որ գրեթե միաժամանակ՝ մասնավորապես՝ մեկ օպերատորի կողմից՝ 2025թ. նոյեմբերի 20-ին, մյուսի կողմից՝ նոյեմբերի 25-ին, երրորդի կողմից՝ դեկտեմբերի 11-ին։
Ընկերության ներկայացուցիչները հանդիպումներ են ունեցել բջջային օպերատորների գործընկերների հետ, ներկայացրել իրենց գործունեության առանձնահատկությունները և պարզաբանել, որ առաջարկվող սակագները ընդունելի չեն։
«Թել-Սել» ԲԲԸ-ից ejc.am–ին պարզաբանում են՝ այն պնդումը, թե գոյություն ունի մինչև 4 անգամ տարբերություն, իրենց գնահատմամբ ունի առավելապես մանիպուլյատիվ բնույթ։ Տարբեր կոմունալ ծառայությունների համար գործում են տարբեր սակագներ, նույնը՝ բջջային օպերատորների դեպքում։ Տոկոսադրույքները կոմերցիոն գաղտնիք են և հրապարակման ենթակա չեն, սակայն վստահեցնում են, որ որոշ դեպքերում դրանք համարժեք են։
«Բանակցությունների ընթացքում մեր կողմից երկու անգամ առաջարկ է ներկայացվել բոլոր օպերատորների համար սակագները համաչափ նվազեցնելու վերաբերյալ, սակայն ոչ բոլորի համար նույն սակագին սահմանելու»,- «Թել-Սել» ԲԲԸ–ից նաև տեղեկացնում են, որ առաջարկի արդյունքում օպերատորներից մեկի համար սակագինը գրեթե համընկնում էր իրենց պահանջածի հետ։ Այնուամենայնիվ, երեք օպերատորներն էլ մերժել են առաջարկը։
Պարզվում է, որ 2025թ. դեկտեմբերի վերջին օպերատորներից մեկի կողմից ընկերությունը ստացել է պայմանագրի լուծման ծանուցում, համաձայն որի՝ 2026թ. փետրվարի 1-ից պայմանագիրը համարվում է լուծված։ 2026թ. հունվարի 26-ին պաշտոնական հարթակներով են հաճախորդներին տեղեկացրել, որ տվյալ օպերատորի օգտին վճարումներ այլևս հնարավոր չի լինի իրականացնել՝ պայմանագրի միակողմանի լուծման պատճառով։
Նույն օրը, ավելի ուշ, մյուս երկու օպերատորները նույնպես ծանուցել են պայմանագրերի դադարեցման մասին՝ համապատասխանաբար փետրվարի 1-ից և փետրվարի 2-ից։ Չնայած այն հանգամանքին, որ պայմանագրի համաձայն նրանք պարտավոր էին տեղեկացնել առնվազն 30 օր առաջ, այդ պահանջը չի պահպանվել, և ծառայությունը դադարեցվել է փետրվարի 2-ից։
«Թել-Սել»–ում վերլուծում են՝ հատկանշական է, որ երեք բջջային օպերատորներն էլ ունեն իրենց խմբին պատկանող վճարահաշվարկային ընկերություններ։ Ըստ հրապարակումների՝ այդ ընկերությունների համար առաջարկված սակագները ընդունելի են։ Սա բնական է, քանի որ նույն խմբի ընկերությունները կարող են ունենալ ներքին պայմանավորվածություններ և համատեղ ծախսեր, ինչը թույլ է տալիս կիրառել ավելի շահավետ սակագներ։ Սակայն , պայմանագրերի միակողմանի դադարեցմամբ երեք օպերատորները իրենց վճարահաշվարկային ընկերությունների համար ստեղծում են արհեստական մրցակցային առավելություն։ Սա, ընկերության գնահատմամբ, նմանվում է օլիգոպոլ համակարգի ձևավորման փորձի։ Այդ հարցին վերջնական գնահատական կարող են տալ միայն համապատասխան պետական մարմինները։
Հարց են բարձրացնում՝ եթե այդ վճարահաշվարկային ընկերությունները կարող են աշխատել օպերատորների առաջարկած սակագներով, ապա արդար մրցակցության պայմաններում պետք է կիրառվեն մարքեթինգային և ծառայությունների որակի բարելավման գործիքներ, որպեսզի հաճախորդը ազատ ընտրությամբ նախընտրի համապատասխան վճարամիջոցը։ Մինչդեռ իրենց ընկերությանը պարզապես զրկվել է ծառայություն մատուցելու հնարավորությունից, ինչից շահում են օպերատորների խմբում գործող ուղիղ մրցակիցները։
Ամենակարևորն այն է, որ այս իրավիճակից տուժում են քաղաքացիները, հատկապես մարզերում և գյուղական համայնքներում բնակվող մարդիկ։ Նրանք էականորեն կորցրել են իրենց համար հարմար և հասանելի 24/7 կանխիկով և բջջային հավելվածով վճարման հնարավորությունը և կանգնել լրացուցիչ դժվարությունների առաջ։ Ստացվում է, որ հաճախորդների համար վճարման տեսանկյունից ստեղծվել է անհարմարավետություն։