Թուրքիայի Կենտրոնական բանկի արժութային պահուստներն աճում են բարեկամ երկրների աջակցության շնորհիվ. Էրդողան
Թուրքիայի կենտրոնական բանկի արժութային պահուստներն աճում են, քանի որ բարեկամ երկրները աջակցություն են ցուցաբերում, վստահեցրել է նախագահ Թայիփ Էրդողանը, հայտնում է Haberturk հեռուստաալիքը։Թուրքիայի կենտրոնական բանկի պահուստները ճնշման տակ են հայտնվել արտարժույթի շուկայում նրա միջամտությունների պատճառով՝ թուրքական լիրային աջակցելու և պետական հաստատությունների կարիքները արժույթով բավարարելու արդյունքում:
«Մեր կենտրոնական բանկի պահուստները սկսել են աճել։ Սա մեզ թույլ է տալիս արտարժութային պահուստների առումով հարմարավետ գործել։ Այս առումով շատ բարեկամ երկրներ ներկայումս ցուցաբերում են անհրաժեշտ աջակցություն»,- ասել է Էրդողանը։ «Նրանցից վերցրած մեր փոխառություններն ավելի ուժեղ են դարձնում մեր կենտրոնական բանկը», - ասաց նա:
Կենտրոնական բանկի զուտ արժութային պահուստները օգոստոսի առաջին երկու շաբաթվա ընթացքում վերականգնվել են 20 տարվա նվազագույնից՝ հասնելով 6,1 մլրդ դոլարի, սակայն այդ ամսվա վերջում կրկին փոքր-ինչ նվազել են:
Կենտրոնական բանկի վերջին տվյալների համաձայն՝ մեկ շաբաթվա ընթացքում բանկի զուտ միջազգային պահուստներն աճել են մոտ 1,5 մլրդ դոլարով՝ մինչև 14,1 մլրդ դոլարի:
Անկարան 28 միլիարդ դոլարի սվոփ-գործարքներ է կնքել Արաբական Միացյալ Էմիրությունների, Չինաստանի, Կատարի և Հարավային Կորեայի հետ։ Թուրքիան նաև հույս ունի Սաուդյան Արաբիայի հետ սվոփ գործարք կնքել և քայլեր է ձեռնարկել բարելավելու հարաբերությունները Եգիպտոսի և Իսրայելի հետ:
Էրդողանը նաև ասել է, որ Եվրոպայից և այլ երկրներից ընկերությունները մոտ 20 միլիարդ դոլարի ներդրումներ են կատարում Թուրքիայում։
Աղբյուրը՝ news.am