Գյումրի համայնքի ղեկավար Վարդգես Սամսոնյանն ընդունել է Վերակառուցման և Զարգացման Եվրոպական բանկի (ՎԶԵԲ) ներկայացուցիչներին

Հանդիպմանը մասնակցել են նաև Գյումրու համայնքապետարանի ոլորտային պատասխանատուներ:

Վարդգես Սամսոնյանը ողջունել է հյուրերի այցը Գյումրի, մանրամասն ներկայացրել է ՎԶԵԲ փողոցաշինական ծրագրի շրջանակներում Գյումրիում իրականացված աշխատանքները, խոսել ասֆալտապատման ծավալների, լուսավորության ցանցի արդիականացման և մի շարք այլ հարցերի մասին։

Հանդիպման ընթացքում քննարկվել է նաև «Կանաչ քաղաք» գործողությունների, ՎԶԵԲ ծրագրի Գ Տրանշի միջոցների օգտագործման/ վերաբաշխման, էլեկտրական ավտոբուսների ներմուծման ծրագրին առնչվող բազմաթիվ հարցեր։

Համայնքի ղեկավարն իր խոսքում ընդգծել է, որ Գյումրու Անի թաղամասի փողոցները խիստ անբարեկարգ են և առավել նպատակահարմար կլինի ՎԶԵԲ ծրագրով լուսավորության ցանցի համար նախատեսված գումարը նպատակաուղղել տվյալ փողոցների հիմնանորոգմանը։

Հանդիպման ավարտին համայնքի ղեկավարի ուղեկցությամբ հյուրերը շրջել են ՎԶԵԲ փողոցաշինական ծրագրի շրջանակներում հիմնանորոգված և շահագործման հանձնված փողոցներում, ապա նաև՝ Անի թաղամասում։ Տեղում ծանոթացել են տվյալ թաղամասի փողոցների ընդհանուր վիճակին։ Նշենք, որ այս պահին սուբվենցիոն ծրագրի շրջանակներում հիմնանորոգվում են «Անի» թաղամասի միայն 3-րդ և 11-րդ փողոցները: