Ինֆլյացիայի նվազեցման մասին ԱՄՆ օրենքը սպառնում է Եվրոպայի արդյունաբերական բազային
Ինֆլյացիայի նվազեցման մասին ԱՄՆ օրենքը եւ էներգակիրների գների աճը սպառնում են Եվրոպայի արդյունաբերական բազային , նախազգուշացրել է Եվրահանձնաժողովի փոխնախագահ Մարգրեթ Վեսթագերը։
Օգոստոսին ԱՄՆ նախագահ Ջո Բայդենը 430 միլիարդ դոլար արժողությամբ հակագնաճային օրինագիծ է ստորագրել, որը ներառում է որոշ ոլորտների, օրինակ՝ ավտոմոբիլային ոլորտը, պետական օգնության միջոցները:
ԵՄ-ն հայտարարել է , որ նոր օրենսդրությունը, որը հարկային արտոնությունները պայմանավորում է ԱՄՆ-ում արտադրությամբ, վտանգում է եվրոպական ավտոմոբիլային ընկերություններին եւ նրանց, ովքեր կանաչ տնտեսությունից ապրանքների լայն տեսականի են արտադրում։
Վեսթագերն ասել է, որ այս հարցը վճռորոշ նշանակություն ունի ԵՄ-ի համար։ «Մենք սա շատ կարեւոր խնդիր ենք համարում։ Էներգետիկ ճգնաժամի այս համակցությունը եւ ինֆլյացիայի նվազեցման մասին օրենքը վտանգում են Եվրոպայի արդյունաբերական բազայի մի մասը»,-ասել է նա։
Նա ընդգծել է ԱՄՆ կառավարության հետ լուծում գտնելու կարեւորությունը։
Աղբյուրը՝ news.am