ԱՆԻՖ-ի ավելացված կանոնադրական կապիտալը կուղղվի ազգային ավիափոխադրողի ստեղծմանը

Այսօր ՀՀ կառավարությունը որոշեց   4 մլրդ 733 մլն դրամով ավելացնել Հայաստանի  պետական հետաքրքրությունների ֆոնդի (ԱՆԻՖ) կանոնադրական կապիտալը:  Այս որոշման արդյունքում հատկացվելիք գումարը  նպատակաուղղվելու է ս.թ. հուլիսի 14-ին Էյր Արաբիա ընկերության հետ  ստորագրված հուշագրի արդյունքում ազգային ավիափոխադրող ընկերության  ստեղծմանը։ 

ԱՆԻՖ-ի գործադիր տնօրեն Դավիթ Փափազյանը կառավարության նիստում հայտարարել է, որ  գործարքն իրականացվել է հաշվարկի,  պրոֆեսիոնալ գնահատման արդյունքում եւ ստացել են առավելագույնս կենսունակ  մոդել։  

«Մենք պարզապես ավիաընկերություն չենք գրանցում, որը կարող էր տեսականորեն  դառնալ վերջին 20-25 տարիների ընթացքում նման փորձերից մեկը։ Այս ծրագրով  մենք ստեղծում ենք ազգային մրցունակ ավիափոխադրող, որն արդեն ի սկզբանե  ունի մրցակցային առավելություն՝  Էյր Արաբիա ընկերության  մոտ 20  տարվա դրական փորձը»,- ասել է նա և վստահեցրել, որ սա   երկարաժամկետ, մրցունակ ռազմավարության վրա հիմնված  ազգային ավիափոխադրող ունենալու առաջին հնարավորությունն է։ 

Անդրադառնալով մոդելի  առավելություններին, Դավիթ Փափազյանը նշել է, որ Մերձավոր Արևելքի և Հյուսիսային Աֆրիկայի առաջին և ամենամեծ  բյուջետային ավիափոխադրողի հետ համատեղ ընկերության ստեղծումը մեծ նշանակություն ունի նաեւ  ներդրումային մրցունակության տեսանկյունից ։

Նրա խոսքով՝ ընկերությունը շոշափելի է դարձնելու մի  քանի այլ  թիրախային նպատակներ՝  մասնավորապես Հայաստանն աշխարհի հետ կապելու,  ճանաչելի դարձնելու, սփյուռքի համար հասանելիությունը մեծացնելու առումով։

 Նշենք նաև, որ ընկերությունը չի ունենալու ոչ մի պետական արտոնություն։