Հաշվետվություն Կոտայքի մարզպետարան

Շարունակում ենք ձեր ուշադրությանը ներկայացնել կառավարության 2022 թվականի սուբվենցիոն ծրագրերով մարզի համայնքներում իրականացված աշխատանքների վերաբերյալ մանրամասն հաշվետվություն՝ ըստ համայնքների ու կատարված աշխատանքների ծավալի:

Շարքը սկսում ենք մարզկենտրոն Հրազդանից:

Եվ այսպես․

Խոշոր ծրագիր է իրականացվում Հրազդան համայնքի 3200 բնակիչ ունեցող Լեռնանիստ բնակավայրում. արդիականացվում է խմելու ջրի համակարգը: Սուբվենցիայի շրջանակում կառավարություն- համայնք՝ 70%-30% համաֆինանսավորմամբ անց է կացվում 22 կմ երկարությամբ ջրագիծ: Ծրագրի արժեքը 380 մլն. դրամ է. աշխատանքները նախատեսված է ավարտել մինչև տարեվերջ:

Հրազդանի երեք մանկապարտեզներ՝ թիվ 11, թիվ 6 և թիվ 8, հիմնանորոգվում են. աշխատանքները առաջիկայում կմեկնարկեն: Եվս երկու մանկապարտեզներում՝ թիվ 4 և թիվ 15, իրականացվում են վերանորոգման, կոյուղագծերի փոխարինման և ընթացիկ այլ աշխատանքներ: Աշխատանքներն իրականացվում են կառավարություն-համայնք՝ 70%-30 % համաֆինանսավորմամբ

Հրազդանի Մաքրավան թաղամասում կառուցվում է ավտոտեխսպասարկման կայանատեղի և ծածկարան: Ծրագրի արժեքը շուրջ 75 մլն. դրամ է, աշխատանքներն իրականացվում են կառավարություն-համայնք՝ 35%-65 % համաֆինանսավորմամբ

Ընթացքի մեջ են նաև Հրազդանի Շառլ Ազնավուրի անվան քաղաքային զգոսայգու բեմի և սանհանգույցի հիմնանորոգման, ինչպես նաև Հրազդանի տարբեր թաղամասերում կարուսելների տեղադրման և տարածքների բարեկարգման աշխատանքները: Ծրագրի արժեքը շուրջ 37 մլն. դրամ է, կառավարության ներդրումը 30% է, համայնքինը՝ 70%:

Հրազդան քաղաքում և համայնքի տարբեր բնակավայրերում այս տարի տեղադրվել են ժամանակակից կանգառներ: Ծրագրի շրջանակում համայնքի երկու անվանական մուտքերում նաև արտաքին լուսավորության համակարգ է կառուցվում: Ծրագրի ընդհանուր արժեքը ավելի քան 80 մլն. դրամ է, կառավարության ներդրումը 35% է, համայնքինը՝ 65%: Կանգառներն արդեն տեղադրված են: Լուսավորության անցկացման աշխատանքները շուտով կավարտվեն:

Հրազդան քաղաքում և համայնքի բնակավայրերում իրականացվել են ներհամայնքային ճանապարհահատվածների հիմնանորոգման մեծամասշտաբ աշխատանքներ: Ծրագրի արժեքը ավելի քան 913 մլն. դրամ է, կառավարության ներդրումը 35% է, համայնքինը՝ 65%: Աշխատանքներն ավարտված են:

Ընթացքի մեջ է Հրազդան քաղաքի և համայնքի Քաղսի բնակավայրի արտաքին լուսավորության ցանցի անցկացման ծրագիրը, որով Հրազդան քաղաքում գիշերային լուսավորության խնդիրը գրեթե լուծված կարելի է համարել:

Ծրագրի արժեքը 104 մլն դրամից ավելի է, կառավարության ներդրումը 45% է, համայնքինը՝ 55%:

Մեր համայնքներն ընթանում են կայուն և համաչափ զարգացման ճանապարհով: