Արցախը Հայաստանին կապող միջանցքը փակ է, առկա է դեղորայքի և բժշկական նյութերի զգալի պակաս
Արցախի բուժհաստատություններում շարունակում են հետաձգել պլանային վիրահատությունները․ Արցախը Հայաստանին կապող միջանցքը փակ է, առկա է դեղորայքի և բժշկական նյութերի զգալի պակաս։
Ստեփանակերտի հանրապետական բժշկական կենտրոնի տնօրեն Մհեր Մուսայելյանը վստահեցնում է, որ ծառայության որակի վրա չի ազդել, բայց այս շրջափակման հետևանքով առկա է դեղորայքի և բժշկական նյութերի զգալի պակաս
պլանային վիրահատությունները հետաձվել են, միայն նրա համար, որ կարողանանք այդ պահուստային պարագաներն օգտագործենք ավելի հրատապ դեպքերի համար:
Հանրապետական բժշկական կենտրոնում այժմ բուժում է ստանում 91 քաղաքացի: Նրանցից 13-ը գտնվում է վերակենդանացման բաժանմունքում, 6-ի առողջական վիճակը գնահատվում է ծայրահեղ ծանր: Ըստ Մհեր Մուսայելյանի՝ իրականացվել են 13 վիրահատություն՝ բոլորը սուր ցուցումներով, և կարելի է ասել այս օրերին պրակտիկորեն 90-ից թիվը չի իջել․ բուժառուների և վերակենդանացման բաժանմունքում թիվը տատանվում է 10-13 մարդ:
Միջանցքը փակվելուց հետո կարմիր խաչի միջազգային կոմիտեն Արցախից 17 հիվանդ է տեղափոխել, նաև դեղորայքի տեսքով հումանիտար աջակցություն ցուցաբերել: Մանկական հիվանդանոցի տնօրենի խոսքով՝ դա բավարար չէ, որ անգամ լաբորատոր պլանային միջոցառումները վերսկսեն:
Ստեփանակերտի «Արևիկ» բուժմիավորման տնօրեն Կարեն Մելքումյանի խոսքով՝ բոլոր պլանային միջոցառումները կասեցվել են։ Առաջնահերթությունը տալիս են միայն սուր վիճակում գտնվող երեխաների բուժօգնությանը: Մանկական հիվանդանոցում բուժվող երեխաներից 13-ը գտնվում է նորածնային և վերակենդանացման բաժանմունքներում: Որոշ մասնագետների բացակայությունը փորձում են լրացնել հայաստանյան գործընկերների օգնությամբ: