Արցախի հողը հատուկ ուժ ունի, այն մարդուն է փոխանցվում նաև գինու միջոցով ․ «Yesai wine»

    Աշխատել  ու արտադրել՝ միայն Արցախում

2019թ Ստեփանակերտում հիմնադրված «Yesai wine» ընկերության սեփականատեր Տիգրան Աղաբաբյանը վստահեցնում է՝ ոչ մի դժվարության առջև կանգ չեն առնի, արտադրությունն էլ Հայաստան կամ որևէ այլ վայր չի տեղափոխի։ Պատճառները  շատ են՝  նպաստել աշխատատեղերի պահպանմանը և ավելացմանը, աջակցել Արցախի պետբյուջեին՝  վճարելով հարկերը սատարել Արցախի գյուղատնտեսության և խաղողագործության զարգացանը։ Նպատակը՝ որպեսզի հայը մնա իր հողում ՝ հստակ գիտակցելով, որ  Արցախը հայկական է,  քանի դեռ այնտեղ հայեր են ապրում։ «Yesai wine»–ն արտադրում է   խիտ, տտիպ հագեցած կարմիր ու չոր գինի՝ խնդողնի տեսակի խաղողից, Rkatsitel  տեսակի խաղողի  սպիտակ գինի՝ ծաղկային ու ցիտրուսային փնջով, ինչպես նաև նռան չոր գինի՝ բնական, չվերականգված։  Շուկայում այս պահին առկա են միայն կարմիր ու չոր գինիները։

Մինչ 2020 թվականի սեպտեմբերի 27–ը  խաղող  մթերում էին Հադրութի շրջանի Մեծ Թաղեր գյուղից։ Պատերազմից հետո փոխվեց հումքի մթերման աշխարհագրությունը։ Այժմ մթերում են  Մարտակերտի ու Ասկերանի շրջանից։  Աշխատում են ոչ թե քանակի, այլ ՝ որակի վրա։ Արտադրում են Արցախում, իրացնում՝ Երևանում։

 

 Այժմ՝ շրջափակման հետևանքով արդեն 40 օր է չեն կարողանում գինիները  Երևան հասցնել։ Պահուստավորված որոշակի քանակություն ունեն։ Այժմ լուրջ խնդիր է տրանսպորտն ու փակ ճանապարհը։ «Բայց փակ ճանապարհը աշխատանքները դադարեցնելու պատճառ չպետք է դառնա»,–  ասում է Տիգրան Աղաբաբյանը։   

Ծախսերի մեծ մասն արդեն իսկ ուղղված էր ճգնաժամային խնդիրների լուծմանը: Հիմա շրջափակումն ու  ստեղծված իրավիճակն ավելի լուրջ ֆինանսական, տնտեսական մարտահրավերների առաջ են կանգնեցրել: Այս տարվա պետբյուջեով Արցախում ակնկալվում էր  50 մլրդ դրամի եկամուտ ստանալ, բայց շրջափակման առաջին օրվանից ակնհայտ է, որ հնարավոր չէ ապահովել այս մակարդակը։